Быйылгы үөрэх дьылыгар Н.Г.Чернышевскай аатынан Бүлүүтээҕи педагогическай колледж төрүттэммитэ 95 сылын бэлиэтиир. Онон сибээстээн, колледжка, улууска араас көрсүһүүлэр, быыстапкалар, күрэхтэһиилэр, фестиваллар ыытыллаллар.
Оттон аны саас кулун тутар 28-30 күннэригэр колледжка үбүлүөйдээх тэрээһиннэр ыытыллыахтара, ыраахтан-чугастан ыалдьыттар тоҕуоруһуохтара. Бу туһунан биһиэхэ Саха Өрөспүүбүлүкэтин уопсастыбаннай түмсүүлэрин үлэлэрин сайыннарыыны өйүүр «Эйгэ» уопсастыбаннай тэрилтэ иһитиннэрдэ. Бу, Валентина Васильева бэрэссэдээтэллээх тэрилтэ Саха сирин 25 улууһун уопсастыбаннай холбоһуктарын түмэр.
“Эйгэ” биир көхтөөх чилиэнинэн Бүлүүтээҕи педколледж иһинэн үлэлиир “Далбар Хотун” түмсүү буолар. “Далбар Хотун” түмсүү (сал.К.М.Семенова) кэлэктиибэ колледж үбүлүөйүгэр анаан, бэртээхэй панно бэлэмнээбит. Бу панно кыраайы үөрэтэр мусуойга туруоҕа.
Оттон бу ый 12 күнүттэн киин куоракка Дьокуускайга, М.К.Аммосов аатынан Хотугулуу-Илиҥҥи федеральнай университекка, Бүлүү педколледжын күннэрэ ыытыллыахтара. Киэҥ бырагыраама иһинэн быыстапка тэриллиэҕэ. Манна, устудьуоннары, преподавателлэри итиэннэ Дьокуускайга олорор Бүлүү колледжыгар араас сылларга үлэлээбит бэтэрээннэри кытта көрсүһүүлэр буолуталыахтара. Үбүлүөйдээх уруоктар, “төгүрүк остуол” тула олорон санаа атастаһыыта ыытыллыахтара, бииргэ үлэлэһэргэ инники былааннар торумнаныллыахтара, Сөбүлэһиигэ илии баттаһыы буолуоҕа.
Татьяна МАРКОВА, «Саха сирэ» хаһыат, edersaas.ru