Бүлүү улууһун баһылыга Сергей Винокуров “улуус быйылгы сыллааҕы бүддьүөтүн докумуонугар илии баттаабаппын» диэн бу күннэргэ ол тула айдаан таҕыста. Sakhalife сайтка Бүлүү улууһун сэбиэтин дьокутаата Игорь Григорьев эппитинэн, улуус баһылыга планеркаҕа норуот талбыт бэрэстэбиитэллэрин “акаарылар…” диэбит үһү. Маны утаран нэһилиэнньэ пикеткэ тахсаары аймаммыт. Бу туһунан дьокутааттартан чуолкайдастыбыт.
Иван Васильев, «Саха сирэ» хаһыат, www.edersaas.ru
Былдьаһыктаах бырта сыата
Улуус дьаһалтата “АЛРОСА” хампаанньаттан дивидент быһыытынан киирэр 34,5 мөл. солк барытын Култуура дьиэтин тутууга туһанарга этии көтөхпүтэ. Улуус мунньаҕын дьокутааттара «АЛРОСА» дивидениттэн Култуура дьиэтин тутарга сөбүлэспиттэрэ.
Былырыын аукцион бэрт түргэнник ыытыллан, кыайыылааҕынан “Легион ГРК” тахсыбыта. Тэрилтэҕэ култуура дьиэтин туттараары Бүлүү улууһун дьаһалтата 10 мөл. солк. ыыппыта. Ол эрэн, салгыы суутунан быһаарсыы түмүгэр, Арбитражнай суут хантараагы дьиҥэ суоҕунан аахпыта. “Легион ГРК” ылбыт үбүн төннөрө илик.
Ахсынньыга буолбут сессияҕа сорох дьокутааттар ити харчыны ылбыт тутуу тэрилтэтэ ылбыт харчытын олохтоох бүддьүөккэ төннөрөрүн туруорсубуттар уонна тутуу аукционун хат ыыталларыгар этии киллэрбиттэр.
Аны туран, дьокутааттар Бүлүү улууһугар алмаас дивидениттэн киирэр үбү (үөһээ этиллибит 34,5 мөл.) икки хайысхаҕа туһанарга быһаарбыттар. Бастатан туран, 18 мөл. солк. элбэх оҕолоохторго түҥэтиллибит учаастакка инфраструктураны оҥорууга уонна 16,5 мөл. солк. өрүс уҥуор сытар Халбаакы нэһилиэгэр киин ититэр ситими тардыыга туһанарга куоластаабыттара.
Бу быһаарыыны кытта сөпсөспөккө улуус баһылыга Сергей Винокуров бүддьүөтү ылыммакка олорор эбит. Мантан сылтаан Бүлүү улууһун уопсастыбаннаһа пикет тэрийэргэ быһаарыммыт.
Дьон олоҕо тупсара инники күөҥҥэ сылдьыахтаах
Халбаакы нэһилиэгэ, кырдьык, бэрдэ суох балаһыанньалаах. Дьиҥэр, Бүлүү куоратыттан чугас сытар. Бүлүү куораттан өрүһү аннынан утах таһаарар буоллар, төһө баҕарар, гаас ситимэ тиийиэн сөп этэ. Иккиһинэн, Орто Түҥнээҕи гаас баайдаах сиртэн тардыаҕы эмиэ ыраах. Чугаһынан оттук мас чордонон бүтэн турар.
Олохтоохтор киин ититэр ситими туруорсубуттара ыраатта. Баһылык Алексей Васильев кииннэммит хочуолунайга чааһынай дьиэни холбуур соругу туруоруммутун улуус дьокутааттара өйөөбүттэр.
Бу, дьиҥэр, сөптөөх дьаһаныы буолар. Халбаакыга эдэр дьон олохсуйа кэлэн, саҥа дьиэни туттуулара балай да элбээбит. Кэлиҥҥи кэмҥэ судаарыстыба бэлиитикэтэ дьон олоҕо тупсарын туһугар диэн санаанан салайтараллар. Онон нэһилиэнньэ олоҕо тупсарын туһугар улуус сэбиэтин дьокутааттара сөптөөх былааны олоххо киллэрэргэ этии киллэрбиттэриттэн, онно утарсыы тахсыбыта, кырдьык, өйдөммөт.
Дьокутааттар санаалара
Василий Мандаров, Бүлүү улууһун сэбиэтин дьокутаата:
— Улуус баһылыга бүддьүөт сыыһа ылыллан эрэр диэн илии баттаабата. Хомойуох иһин, биһиги кыһалҕабытын бэлиитикэҕэ соҥноотулар. Дьон кыһалҕатын быһаарыах оннугар, быыбарга туттуллар араас технология көрүҥэ диэн күтүрээтилэр. Дьиҥэр, быыбарга туох да сыһыана суох.
Халбаакы — Бүлүү улууһугар оһоҕунан оттунан олорор соҕотох нэһилиэк. Дьокутааттар ылыммыт быһаарыыбыт олоххо киирдэҕинэ, Халбаакы нэһилиэнньэтэ 100% киин ититэр ситимҥэ холбонон, олох-дьаһах тупсуоҕа. Халбаакы нэһилиэгэ кэскиллээх, инникилээх, олоххо тардыһыылаах, туруу үлэһит ыччаттаах. Салгыы өссө күүскэ туруорсан, дьоммут олоҕо тупсарыгар кыахпытын түмэн ситиһиэхпит диэн бигэ эрэллээхпин.
Гаврил Корякин, Бүлүү улууһун депутаттарын Сэбиэтин бэрэссэдээтэлэ:
— Президиум быһаарыытынан бүддьүөтү көрөр сиэссийэ тохсунньу 27 күнүгэр буолуохтаах. Онно, ити айдааннаах 34, 5 мөл.солк резервнэй пуондаҕа уган туран, бүддьүөтү ылыныахпыт. Ити былдьаһыктаах харчыны үллэрэргэ анаан анал хамыыһыйа сиэссийэҕэ тэриллиэҕэ. Онон улуус бүддьүөтэ суох хаалбат.
Иван ВАСИЛЬЕВ.