Быйыл сайын Олоҥхо ыһыаҕа Бүлүү куоракка ыытыллыаҕа. Улуус уонна өрөспүүбүлүкэ салалталара ыһыаҕы тэрийиигэ күүстээх үлэни ыыталлар.
Александр ТАРАСОВ, «Саха сирэ» хаһыат, edersaas.ru
Бүлүү улууһугар сылын аайы тэрилтэлэр икки ардыларыгар бэстибээл ыытыллар. Онуоха быйыл Олоҥхо ыһыаҕа буоларынан сибээстээн, Бүлүү улууһун дьаһалтата бэстибээлгэ биллиилээх олоҥхоһут Василий Каратаев «Модун Эр Соҕотох» олонхотун туруорда. Сылдьыбыт дьон бэркэ диэн астыммыттар.
Сүрүн оруоллары улуус баһылыга Сергей Винокуров, улуус баһылыгын 1-кы солбуйааччы Василий Лукин уонна полиция бэтэрээнэ, дьаһалта үлэһитэ Дмитрий Седалищев толордулар. Дмитрий Седалищев «Модун Эр Соҕотох» олоҥхоттон үөһээ, орто, аллараа дойдулар төрүттэнэллэрин туһунан быһа тардыыны иһитиннэрдэ. Улуус баһылыга Сергей Винокуров орто дойдуга эр киһи уонна дьахтар аналларын, оҕолоноллорун туһунан толордо. Оттон Василий Лукин бухатыыр уол буутун этэ буһан, холун этэ хойдон аллараа дойду абааһыларын кытта охсуһан кыайбытын туһунан олоҥхолоото. Олоҥхо дьоруойдарын Бүлүү улууһун дьаһалтатын үлэһиттэрэ таҥас-сап кэтэн толордулар, оонньоотулар.
Бүлүү улууһун баһылыгын бастакы солбуйааччы Василий Лукин:
– Биллэн турар, биһиги артыыстар да, олоҥхоһуттар да буолбатахпыт эрээри, ис кыахпытын барытын туһанан кытынныбыт. Көрөөччү олус бэркэ кыһанан-мүһэнэн толордугут диэн сыаналаата. Уопсайынан, бэрт сэргэхтик ааста. Үлэҕэ баттата сылдьан, итинник ураты түгэҥҥэ кыттан ылар олус үчүгэй. Киһи наһаа сынньанар, сэргэхсийэр эбит.
Хаартыскаҕа хаҥастан уҥа: Дмитрий Седалищев, улуус баһылыга Сергей Винокуров, бастакы солбуйааччы Василий Лукин.
