Бүгүҥҥүттэн Брянскай куоракка көҥүл тустууга “Локомотив” физкультурнай-спортивнай уопсастыба чөмпүйэнээтэ саҕаланар. Күрэхтэһии кыайыылаахтара аны сайын от ыйыгар буолар Арассыыйа чөмпүйэнээтигэр кыттар быраабы ылыахтара.
Муус устар 19-гар күрэс кыттыылаахтарын сэрэбиэйдэһиилэрэ буолар. Сарсыҥҥыттан барыллаан хапсыһыылар саҕаланыахтара. Бары ыйааһыннарга түмүк хапсыһыылар муус устар 21-гэр ыытыллыахтара.
Бу түһүлгэҕэ Саха сирин күүстээх бөҕөстөрө, ол иһигэр норуоттар икки ардыларынааҕы кылаастаах спорт маастардара Ньургун Александров уонна Герман Устинов, дойду чөмпүйэнээтигэр путевка ылар сыаллаах киирсиэхтэрэ.
“Локомотив” уопсастыба чөмпүйэнээтигэр кыттар Саха сирин хамаандатын састааба: Федор Постников (57 кг), Быйаман Яковлев (57 кг), Семен Громов (57 кг), Айтал Захаров (61 кг), Яков Павлов (61 кг), Владислав Кривошапкин (61 кг), Христофор Потапов (61 кг), Ньургун Александров (61 кг), Дьулустаан Булатов (65 кг), Герман Устинов (70 кг), Стив Попов (70 кг), Дьулустаан Сивцев (74 кг), Ньургун Сергин (92 кг).
Роман Попов, “Саха сирэ” хаһыат, edersaas.ru