Бөҕөстөрбүт Турцияҕа аан дойду чөмпүйэнээтигэр тустуохтара

Ааптар: 
Бөлөххө киир:

Алтынньы 6-7 күннэригэр Турция Саригерме куоратыгар кумахха тустууга аан дойду чөмпүйэнээтэ буолар. Бу UWW былааҕынан ыытыллар түһүлгэҕэ Арассыыйа чиэһин алтыс төгүлүн Саха сирин бөҕөстөрө көмүскүөхтэрэ.

Бу иннинээҕи сылларга кумахха тустууга аан дойду чөмпүйүөнүн үрдүк аатын Юрий Старостин, Леонид Спиридонов, Вадим Семенов, Герман Устинов, Дмитрий Донской, Станислав Степанов итиэннэ Владислав Левчиков ылан тураллар. Былырыын күһүн Дальяҥҥа (Турция) буолбут күрэстэн Алексей Мигалкин, Платон Саввинов уонна Федор Иванов боруонса мэтээллээх эргиллибиттэрэ.

Быйыл Арассыыйа дэлэгээссийэтин Саха Өрөспүүбүлүкэтин хапсаҕайга федерациятын вице-бэрэсидьиэнэ, Таатта улууһун хапсаҕайга федерациятын салайааччы Прокопий Рахлеев салайыаҕа.

Хамаанда састаабыгар киирдилэр: хапсаҕайга Саха сирин чөмпүйэнээтин үрүҥ көмүс призера Юрий Сергин (70 кг), Бүлүүгэ ыытыллыбыт Олоҥхо ыһыаҕын муҥутуур кыайыылааҕа, “Хаҥалас хапсаҕайа” турнир икки төгүллээх чөмпүйүөнэ Дмитрий Акимов (90 кг), Саха сирин 2015 сыллааҕы чөмпүйэнээтин боруонса призера, өрөспүүбүлүкэтээҕи турнирдар кыайыылаахтара Степан Гаврильев (90 кг үөһэ).

Уолаттарга 60 кг – Сергей Осипов, Чиргэл Ноговицын, 70 кг —Анатолий Уларов, 70 кг үөһэ — Максим Каратаев тустуохтара.

Манчаары Баһылай аатынан спорт национальнай көрүҥнэригэр киинин үлэһитэ, өрөспүүбүлүкэтээҕи категориялаах судьуйа Андриан Захаров чөмпүйэнээккэ судьуйанан үлэлиэҕэ.

Роман ПОПОВ, «Саха сирэ» хаһыат, edersaas.ru

Хаартыска интэриниэттэн ылылынна.

+1
0
+1
0
+1
0
+1
0
+1
0
+1
0
+1
0