Сэтинньи 11 күнүгэр Үөһээ Бүлүүгэ оҕо-аймах тапталлаах норуодунай бэйиэтэ, Аҕа дойду Улуу сэриитин кыттыылааҕа, биир дойдулаахпыт Бүөтүр Тобуруокап төрөөбүтэ 100 сылын бэлиэтиир үөрүүлээх тэрээһин ыытылынна.
edersaas.ru
Үбүлүөйдээх тэрээһиннэр улуус үрдүнэн үс күн устата ыытылыннылар. Бастаан Өргүөккэ, иккис күнүгэр Ороһуга. Түмүктүүр тэрээһин Үөһээ Бүлүүгэ ыытылынна.
Күн бастакы аҥаарыгар Ольга Федорова аатынан улуустааҕы ааҕар балаҕаҥҥа «Хотун Бүлүү» олохтоох тэлэбиидэнньэ устубут «Үйэлээх үлэлэр» диэн алта кэрчиктэн турар уус-уран, публицистическай киинэни көрдөрдүлэр.
Онтон оройуоннааҕы култуура дьиэтигэр
«Тапталлаах бэйиэппит» диэн норуодунай бэйиэт кинигэлэрин быыстапката көрөөччүнү умсугута муста. Бэйиэт олоҕун кэпсиир, көрдөрөр хаартыска быыстапката эмиэ туруорулунна. Тобуруокап айылҕаттан айдарыылаах балыксыт бэрдэ этэ.
Бу кэннэ баһылык Владимир Поскачин уонна улуус уопсастыбаннаһа кыттыылаах ирэ-хоро кэпсэтии, улуу киһибитин ахтан-санаан ааһар чаас тосхойдо.
Манна күндү ыалдьыттарынан Бүөтүр Тобуруокап кыыһа Саргылаана Петровна кэргэнинээн Миитэрэй Наумовтыын, бэйиэт биир дойдулааҕа Василий Харлампьев -Хара Лааҥкы, самодеятельнай композитор Мария Константинова, суруйааччы Муттухаҋ Бороҥ курдук улууспут киэн туттар дьоно буоллулар. Хара Лааҥкы Бүөтүр Тобуруокаптыын хайдах алтыспытын санаата, суруйааччы буола үүнэригэр көмүс куорсуну аспыт күндү киһитин бу күн олус истиҥ тылларынан ахтан, кэлбит дьону долгутта.
Кыыһа Саргылаана Петровна аҕатын олус истиҥник санаата, киһи быһыытынан киэҥ көҕүстээх, улаханнык кыыһыран, мөҕөн-этэн көрдөрбөтөх ураты элэккэй киһи этэ диэтэ. Ийэбитигэр истиҥ сыһыана, бэриниилээх таптала биһиэхэ оҕолоругар үтүө холобур буолла диир.
Бу кэннэ Дария Павлова туруоруутунан «ТАПТЫЫРГА БУРУЙ СУОХ » диэн Бүөтүр Ньукулаайабыс айымньыларынан музыкальнай театрализованнай дьүһүйүү сүүһүнэн киһини биир саалаҕа муста.
Түмүккэ, Нам орто оскуолата «Буукубалар мунньахтара» айымньытын көрдөрөр минньигэс туортарынан кэлбит ыалдьыттары күндүлээтилэр.
Киэн туттар киһибитигэр анаммыт күҥҥэ биһиги, үөһээ бүлүүлэр күндүттэн күндүнү — олоҕу туойбут бэйиэт өлбөт үйэлээх уран тыл маастара буоларыгар сүгүрүйдүбүт, махтанныбыт.
Валентина Догосюсова, edersaas.ru сайтка анаан