Таатта улууһун Туора Күөл нэһилиэгин баһылыгын солбуйааччынан үлэлии олорбут Федор Павлов «Game2:Winter» диэн Бүтүн Россиятааҕы реалити-шоуга кыттарга сананна. Манна Томскай уобалас кыһыҥҥы тайҕатыгар тиийэн, тоҕус ый устата олорон, тыыннаах ордуоххун наада. Федор Таатта улууһугар ыччат лидерэ буолуоҕа диэн сабаҕалааһын баара. Кини edersaas.ru сайтка интервью биэрдэ.
— Федя, туох санааттан тоҕус ый устата тайҕаҕа олорорго сананныҥ? Маннык экстремальнай усулуобуйаны сөбүлүүгүн дуо?
— «Дискавери» ханаалга куруук манныкка майгынныыр биэриилэри көрөбүн. Бэйэм даҕаны бу сайын бэйэбин тургутан, толооҥҥо быһахтаах уонна испиискэлээх эрэ биир нэдиэлэ устата барарга былаанныы сылдьыбытым.
— Ыалгын дуо?
— Кэргэннээхпин, үс оҕолоохпун.
— Эйигин Таатта улууһугар Ыччат лидерэ буолуо дииллэрэ, аккаастанныҥ дуо?
— Ол дуоһунаска тургутуу түмүгүнэн ылаллар. Миэхэ онно кытын диэн үгүс доҕотторум, билэр дьонум этэ сылдьыбыттара. Маҥнай сөбүлэһиэх курдук буолан иһэн, толкуйдаан көрбүтүм, сааһым номнуо 32 ааспыт, 33 барбыт эбиппин. Өрөспүүбүлүкэ үрдүнэн эдэр лидердэр үлэлии сырыттахтарына, мин арыый да кырдьаҕас буолуом диэн тохтообутум. Миигиттэн лаппа эдэр, үлэлиир кыахтаах ыччат Тааттаҕа баар, этэргэ дылы, эдэрдэргэ туораан биэрбитим.
— Реалити-шоуга кыттарга туох түһүмэхтэри туоруугунуй?
— Бастаан интэриниэтинэн социальнай ситимнэр нөҥүө куоластааһын түһүмэҕин ааһаҕын. Онно бастыҥ 120 киһи ахсааныгар киирдэххинэ, иккис түһүмэх куоластааһына саҕаланар. Ол кэнниттэн 30 киһи хаалыахтаах. Бу дьону сыстыганнаах ыарыыга бэрэбиэркэлээн баран, үчүгэй буоллахтарына, анал ыскылаакка илдьэн 100 киилэлээх туттар тээбирин, таҥас-сап таллараллар. Онтон 6 киһилээх бөлөхтөргө арааран, тайҕаҕа илдьэн хааллараллар. Бөлөх маҥнайгы сорудаҕа — хаар түһүөр диэри дьиэ туттуохтаах. Салгыы, кыһыны туораан муус устар 1 күнүгэр диэри ол дьиэҕэр айаххын бэйэҥ булунан олоруохтааххын. Олохпор манныкка майгынныыр түгэн буола илик эрээри, сыл аайы саас кус көҥүлүн болдьоҕор, күһүҥҥү балык кэмигэр үүтээҥҥэ олоро үөрүйэхпин. Биллэн турар, онтон лаппа атын олох күүтэр эрээри, саха киһитэ ханнык баҕарар түгэҥҥэ өлөн-охтон биэрбэт үөстээх, өбүгэлэрбиттэн ол сатабыл миэхэ эмиэ бэриллибит буолуохтаах диэн эрэнэбин.
— Спордунан дьарыктанаҕын дуо?
— Кыралаан гиирэ спордунан дьарыктанабын. Уруһуйдуубун, тыйаатырга оонньуубун, ырыа ансаамбылын кыттыылааҕабын, өрдөөҕүтэ «КВН» оонньуур этим уонна саамай сүрүн хоббим — булт уонна балыктааһын. Уопсайынан, айылҕаҕа сылдьарбын сөбүлүүбүн. Биэнсийэҕэ таҕыстахпына, үүтээҥҥэ олохсуйуом диэн баҕалаахпын. Ыйга биирдэ биэнсийэ, өйүө ыла сэлиэнньэҕэ киирдэххэ, сөп буолуо этэ.
— Дьоҥҥо ханнык хаачыстыбаны сыаналыыгыный? Тугу сөбүлээбэккиний?
— Чиэһинэй, эппит тылларыгар турар дьону сөбүлүүбүн. Сымыйа хобу-сиби тарҕатар интриганнары сөбүлээбэппин.
— Экстремальнай шоуну Саха сиригэр ыытыахха сөп дуо?
— Инник шоу Саха сиригэр ыытыллыан сөп эрээри, кыһын ортото буолбатах. Күһүн кыһыны кытта көрсөр кэмнэрэ барсыан сөп курдук. Ити шоу Томскай уобаласка буолуохтаах, онно кыһыҥҥы температура ортотунан -17 кыраадыс курдук буолар эбит, ол гынан баран, тыала күүстээх дииллэр.
Game2:Winter шоу «Голодные игры» диэн Голливуд аатырбыт киинэтигэр майгынныыр, ол гынан баран, өлөрсүүтэ суох. Таһаҕаһыҥ 100 киилэттэн ордуо суохтаах эбит. Кыайыылаах 100 000 000 солк.наҕараадаланар. Кыттарыгар 10 000 000 солк. усунуос төлүүр. Шоуну федеральнай ханаалларга көрдөрүөхтэрэ. Бырайыак салайааччыта — Новосибирскай бизнесменэ Евгений Пятковскай. Бырайыагы номнуо тас дойду хаһыаттара, сайтара интэриэһиргээбиттэр.
«Күндү доҕоттор. Бука диэн бу ссылканан киирэн миэхэ куоласкытын биэрэргитигэр сүһүөхтээх бэйэм сүгүрүйэн, хоолдьуктаах бэйэм хоҥкуйан туран көрдөһөбүн. Сибиир тайҕатыгар реалити-шоуга кыттар күүстээх санаа ылынным. Ссылканы арыйдахха, аллара өттүгэр социальнай ситим бэлиэлэрэ баар, репост ыыттахха биир куоласка тэҥнэһэр. Сууккаҕа биирдэ куоластыахха сөп. Хас биирдиигит куолаһа олус наадалаах, онон эркин курдук барыгытыгар эрэнэбин«, — диэн Саха сириттэн кыттар Федор Павлов көрдөһөр.
Ульяна ЗАХАРОВА кэпсэттэ, «Саха сирэ» хаһыат, edersaas.ru