Бэтэринээрийэ департаменын салайааччыта Лариса Макарова бэлиэтииринэн, муниципальнай тэриллиилэр дьаһалталара дьэллик ыттар ахсааннарын сүрүннүүргэ көҕө-нэмэ суох үлэлииллэр. Бэйдиэ сылдьар ыттары тутар пууннары үлэлэтэргэ 13 улуус: Алдан, Булуҥ, Үөһээ Бүлүү, Кэбээйи, Ленскэй, Мирнэй, Муома, Нам, Нерюнгри, Өлүөхүмэ, Хаҥалас, Эбээн Бытантай уонна Дьокуускай эрэ дьиҥнээхтик ылыстылар.
edersaas.ru
Амма, Дьааҥы, Үөһээ Халыма, Бүлүү, Эдьигээн, Мэҥэ Хаҥалас, Ньурба, Өймөкөөн, Сунтаар, Томпо улуустарыттан ханнык да сибидиэнньэ киирэ илик. Ол даҕаны буоллар, 2018 сылга кыыл-сүөл ыарыытыттан сэрэтэр уонна ыарыыны бохсор, эмтиир итиэннэ көрүүтэ-истиитэ суох кыыллары тутан көрөр, дьону ыарыыттан харыстыыр дьаһаллары ыытарга судаарыстыба сорох боломуочуйаларын толорор туһунан сөбүлэһиигэ 34 муниципальнай тэриллии илии баттаста.
Улуустар баһылыктара муниципальнай бүддьүөккэ субвенция үбүн көһөрүү бэрээдэгэ быйыл эмиэ уруккунан хааларын бэркэ билэллэр, ол эбэтэр үп-харчы халтай ордон хаалыытын таһаарбат туһуттан муниципальнай тэриллии төһөнү туттубутун отчуоттаабыт докумуонунан көрөн ыытыллар. Онон олохтоох салайыныы уорганнара бэриллибит боломуочуйаны ситэри туһаныах тустаахтар. Кэмигэр отчуоттаабакка гынан баран, “субвенциябыт былырыыҥҥыттан тоҕо кыччаата” диэн соһуйаллар. Холобур, Мэҥэ Хаҥалас улууһугар былырыын тустаах боломуочуйаны толороругар 535 тыһ. солк. бэриллибит буоллаҕына, отчуоту кэмигэр түһэрбэтэҕин түмүгэр быйыл субвенция кээмэйэ 196 тыһ. солкуобайга диэри кыччатылллыбыт.
Сорох улуустар бэрэстэбиитэллэрэ кыра нэһилиэктэргэ дьэллик ыттары тутан дьаһайарга идэтийбит дьон дэбигис көстүбэттэринэн үлэ үөтэлээбэтин төрүөт оҥостоллор. Боломуочуйа улуус таһымыгар бэриллибитинэн, улуус дьаһалтата нэһилиэктэргэ тахсан үлэлиир биир толорооччуну анаан кэбиһиэн сөп. Оттон өскөтүн муниципальнай тэриллии сөбүлэһиигэ илии баттаһыан баҕарбат буоллаҕына, “Жатай” куораттааҕы уокурук курдук, боломуочуйаны толорортон тута аккаастанара ордук. Ол эрээри, ыарыы туруутугар эппиэтинэһи бүтүннүү олохтоох былаас сүгэр.
Отчуоттан көрдөххө, билиҥҥи туругунан, муниципальнай оройуоннарга бэйдиэ сылдьар ыт ахсаанын сүрүннүүргэ 339 боломуочуйалаах (былырыыҥҥы туһааннаах кэмтэн 16-нан элбэх) быһаарыллыбыт, дьэллик ыттары тутан уодьуганныырга былырыыҥҥытааҕар 34-нэн элбэх сайаапка киирбит, анал оҥоһуулаах 201 пуун тэриллибит (12-нэн аҕыйах), бу кэмҥэ 1872 ыт тутуллубут (78-нан элбэх) уонна 1810 ыт дьууктаммыт. Бу көрдөрүү былырыыҥҥы туһааннаах кэмтэн 300 төбөнөн элбэх.
Василий НИКИФОРОВ, edersaas.ru