Бу күннэргэ Таатта улууһун Баайаҕатын олохтоохторо үөрэппит учууталларын, Андросовтар учуутал династияларын төрүттээччилэр, Саха АССР оскуолаларын үтүөлээх учуутала, РСФСР үөрэҕириитин туйгуна Семен Константинович Андросов төрөөбүтэ 100, учуутал, иитээччи, алын сүһүөх кылаас учуутала Марина Александровна Андросова төрөөбүтэ 95 сыллаах үбүлүөйдэрин бэлиэтээтилэр. edersaas.ru
Махталлаах баайаҕалар нэһилиэктэрин историятын түмэлигэр учуутал Андросовтар ааттарын иҥэрдилэр.
Үөрүүлээх быһыыга-майгыга “Учууталга сүгүрүйүү” скверэ аһылынна. Ытык бэлиэни бэтэрээн учууталлар астылар.
Манна Андросовтар учуутал династияларын ситиһиитин анал дуоската ыйанан, учуутал дьиэ кэргэттэри көлүөнэттэн көлүөнэҕэ сырдата туруоҕа.
Учуутал Андросовтар кыра кыыстара, ахсыс оҕолоро Валентина Андросова дьиэ кэргэн аатыттан биир дойдулаахтарыгар учууталларын умнубаттарыгар махтал тылын эттэ.
Тэрээһин бастакы күнүгэр Андросовтар араас көлүөнэ бэрэстэбиитэллэрэ — оҕолоро, сиэннэрэ уонна хос сиэннэрэ кыттыылаах айар киэһэ буолла.
Тэрээһин долгутуулаах түгэнинэн “Аҕабар сурук” диэн кинигэ сүрэхтэниитэ буолла. Бу кинигэҕэ учуутал Семен Андросов оҕолоро аҕаларын кэриэстээн, 21-с үйэҕэ олорон туох ситиһиилэммиттэрин кэпсээбиттэрэ үгүс киһи интэриэһин тарта. Бу дьоро киэһэҕэ Андросовтарга үөрэммит дьон кэлэн, ахтыспыттыы көрүстүлэр, оҕо саастарын санастылар.
Икки күннээх үбүлүөй сарсыныгар 600 сылы куоһарар Андросовтар учуутал династияларын ыһыаҕа ыһылынна.
Аймахтар биирдии ыалынан сэлэлээн хааман киирбиттэрэ – дьоһуннаах көстүү!
Араас куонкурустар, спортивнай күрэхтэһиилэр дьону барытын көҕүлээтилэр. Оҕотуттан кырдьаҕаһыгар тиийэ актыыбынай кыттыы буолла. Ытык дьоннорун кэриэстиир ыһыах араас куонкурустарын кыайыылаахтара ким дьааһыктаах арыынан, ким спорт, ким булт тэрилинэн наҕараадаланнылар.
Эһээлээх эбээлэрин аатын ылбыт дьон болҕомто киинигэр буоллулар. Ол курдук, 8 Сэмэн, 6 Марыына эһээлэрин уонна эбээлэрин ааттарын үйэтитэ сылдьаллара билиннэ. Итиннэ сиэн, манна хос сиэн — киһи сүргэтэ көтөҕүллэр түгэнэ!
Онтон чугас доҕоттору кытта хаартыскаҕа түһүү саҕаланна. Андросовтар кыыстара Агафья Молонова, Бурятия уонна СӨ култуураларын туйгуна дьүөгэтин РФ үөрэхтээһинин бочуоттаах үлэһитэ, Баайаҕа нэһилиэгин бочуоттаах гражданина, методист-учуутал Ольга Макарованы кытта туралларын хаартыскаҕа түһэрэн үйэтиттим.
Биллэн турар, өрөспүүбүлүкэ нэһилиэктэрин аайы талан ылбыт идэлэригэр бэриниилээх династия үгүс. Ол иһин да буолуо, Таатта Баайаҕатын учуутал Андросовтар оҕолорун, кэскиллээх ыччаттарын төрөппүтү үйэтитии бастыҥ холобурун быһыытынан сырдаттым.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.