Ахсынньы 27 күнүгэр “Саха сирэ” хаһыат 51-с №-гэр “Чыпчаххай” рубрикаҕа “Баанньыкка арыгылааһын” диэн ыстатыйа тахсыбыта. Онно Жорницкай уулуссатыгар турар “Дядя Баня” чааһынай баанньыкка күнүстэри пиибэни атыылыылларын сөбүлээбэтин биллэрэн, Игорь Посельскай диэн киһи Ил Дархан дьаһалтатыгар ыыппыт суругун бэчээттээбиппит.
Бу ыстатыйаҕа хардаран, баанньык хаһаайына Александр Махутов хоруйдаабыт суруга кэллэ. Ону хайдах баарынан таһаарабыт.
“Мин Посельскай Игорь Игоревич баанньык үлэтигэр претензиялаах суругун аахтым. Ол кэннэ кинини кытары сибээстэһэн, көдьүүстээх кэпсэтии таҕыста.
Мин өйдөөбүппүнэн, кинини, уопсайынан, баанньыктарга арыгыны атыылааһын долгутар эбит. Жорницкай уулуссаҕа турар баанньыгы холобур курдук эрэ аҕалбыт. Дьокуускайга биһиэниттэн сыанатынан эрэ уратылаһар өссө 5 баанньык баар.
Бу боппуруоска бэйэм позициябын эппитим, кини мин эппиэппин кытары сөбүлэстэ. Кини тылыттан өйдөөбүппүнэн, эһиги хаһыаккыт редакциятыгар суруйбатах. Суругун туппут тэрилтэ эһиэхэ ыыппыт. Онон “Посельскай редакцияҕа суругун” туһунан этэр буоллаххытына, ол суругу миэхэ көрдөрүҥ.
Атын дьон Посельскайга туһулаан быраабы кэһэр дьайыылары оҥорбуттарын туһунан, мин билэрбинэн, бэрээдэги көрөр уорганнарга сайабылыанньа киирбэтэх. Онон “бэрээдэги кэһии” диэн тиэрмини сөпкө туттаргытыгар көрдөһөбүн.
Ону таһынан, Посельскай И.И. эһиэхэ интервью биэрбэтэҕим диир уонна Ил Дархан дьаһалтатыгар ыыппыт суругун сырдатары баҕарбатах, онон ким эрэ аатыттан, ким эрэ тылыттан толкуйдаан таһаарартан, комментарийдыыртан туттунаргытыгар көрдөһүөм этэ.
Эһиги ыйытыыларгытыгар хоруйдар:
- Арыгы бородууксуйатын атыылыырга лицензия уонна уопсастыбаннай аһылык эбийиэгин аһарга көҥүл баар дуо?
Эппиэт: ИП Махутов А.З. бытовой өҥөнү оҥорор – Баанньык. Бородууктаны уонна утахтары атыылааһынынан баанньык дьиэтигэр буфеты куортамнаһар тэрилтэ дьарыктанар.
- Бэрээдэги көрүүнэн ким дьарыктанарый? Анал үлэһит баар дуо?
Эппиэт: Вневедомственнай харабыл тэрилтэтин кытары дуогабардаахпыт уонна “тревожная кнопка” баар.
- Сарсыардааҥҥы кэмҥэ пиибэ атыытын хайдах быһаараҕытый?
Эппиэт: 1-кы ыйытыыга эппиэти көрүҥ”.
Уопсастыбаннай кыһалҕа
Саха Өрөспүүбүлүкэтин 83-З N-дээх «Гражданнар тус суруктарын көрүү бэрээдэгин туһунан” сокуон 1 баһын 1 ыстатыйатыгар этиллэринэн, гражданин судаарыстыбаннай былаас уорганнарыгар суругунан, эбэтэр электроннай суругунан бэйэтин тус санаатын тиэрдэр бырааптаах. Уорганнар, эбэтэр дуоһунастаах сирэйдэр суругу сокуоҥҥа ыйыллыбыт бэрээдэгинэн, болдьоҕунан көрөн, эппиэт биэрэр эбээһинэстээхтэр.
Онон Ил Дархан уонна бырабыыталыстыба дьаһалтатыгар уопсастыбаны таарыйар кыһалҕа туһунан электроннай сурук киирбитигэр, бу кыһалҕаны сырдатар, быһаарар, уопсастыбаҕа тиэрдэр сыалтан, салгыы хаһыат эрэдээксийэтигэр ыыппыттара. Посельскай суруга эрэдээксийэҕэ баар, онно кини бу кыһалҕаны быһаарарга көрдөһөр. Бэйэтин кытары төлөпүөнүнэн кэпсэтэргэ бу суругуттан аккаастамматаҕа.
Оттон судаарыстыбаннай уорганнар туох этиилээхтэрий?
Матвей Лыткин, СӨ Арыгы атыытын хонтуруоллуур, лицензиялыыр управлениетын салайааччы:
— Пиибэни атыылыыр буоллахтарына, лицензия ылаллара, ЕГАИС ситимигэр учуокка тураллара ирдэммэт. Онон, ылан көрдөххө, сокуону кэспэттэр. Билигин кыраадыстаах эрэ арыгыга лицензия ирдэнэр. Ол эрээри, Госдумаҕа пиибэни эмиэ лицензиялыыр туһунан сокуон бырайыага оҥоһулла сылдьар. “Дорожнай” каартата баар.
Баанньыкка арыгылыыр доруобуйаҕа өссө охсуулаах диэн этиэм этэ. Арыллыбыт этин-сиинин арыгынан сүһүрдэр. Киһи ырааһыра, чэбдигирэ тиийэн баран, соруйан организмын мөлтөтөр. Сүрэххэ-тымырга, быарга-бүөргэ дьайыыта куһаҕан. Пиибэни иһии, медицина өттүттэн көрдөххө, өссө кутталлаах. Тоҕо диэтэххэ, оҕолор, дьахталлар пиибэттэн саҕалыыллар, сыыйа арыгы иһэргэ үөрэнэн хаалаллар. Онон пиибэни арыгы курдук көрөргө уолдьаста.
Ангелина ВАСИЛЬЕВА, «Саха сирэ» хаһыат, edersaas.ru