Баатара оскуолатын оҕолоро Бүтүн Арассыыйатааҕы оонньууга үһүс миэстэни ыллылар
Бу күннэргэ Алабиноҕа (Москва) Бүтүн Арассыыйатааҕы “Кыайыы” диэн ааттаах байыаннай-патриотическай оонньуу түмүктүүр түһүмэҕэ буолан ааста. Дойду 63 эрэгийиэнэ кыттыылаах үрдүк таһымнаах күрэхтэһиигэ Саха сирин аатын Мэҥэ Хаҥалас улууһун Баатара орто оскуолатын кадетскай кылааһын уон үөрэнээччитэ ситиһиилээхтик көмүскээтэ.
edersaas.ru
Кэлиҥҥи уонча сыл устата Саха сирэ тустаах күрэхтэһиигэ аан маҥнайгытын үс иһигэр киирэри ситистэ. Манан сибээстээн, СӨ үөрэҕин уонна наукатын миниистирэ Владимир Егоров үөрэнээччилэри кытта көрүстэ.
Күрэхтэһии алта түһүмэхтэн турар: строевой бэлэмнэнии, бэйэ эрэгийиэнин билиһиннэрии, харгыстары туорааһын, К-74 автоматы ыһыы, таҥыы, сыал ытыыта, “Кыайыылаахтар суоллара”. Маҥнайгы миэстэни Ярославль, иккиһи Волгоград кадеттара ситиспиттэр. Хамаанда Мэҥэ Хаҥалас улууһун үөрэххэ управлениетын иитэр үлэҕэ уонна эбии үөрэхтээһиҥҥэ салаатын сүрүннүүр исписэлииһэ Николай Семенов уонна Баатара орто оскуолатын интэринээтин кадетскай кылааһын иитээччитэ Николай Кузьмин салалталарынан кыттыбыттар.
Оҕолор тэрээһин үрдүк таһымҥа ааспытын, парашюттаах, бөртөлүөттээх маастар-кылаастары, түүҥҥү ытыыны биһирээбиттэрин туһунан кэпсииллэр. Күрэхтэһиигэ кыттан элбэҕи билбиттэрэ-көрбүттэрэ, харахтара уоттаммыта тута көстөр.
Санатан эттэххэ, хамаанда былырыын Бүтүн Арассыыйатааҕы “Кыайыылаах нэһилиэнньигэ” (Казань) байыаннай-патриотическай оонньууга кыттан 53 эрэгийиэнтэн 12-с буолбута. Быйыл “Снежный барс” өрөспүүбүлүкэтээҕи күрэхтэһиигэ маҥнайгы миэстэни ылбыта.
Оонньууга ситиһиилээхтик кыттыбыт, Саха сирин аатын үрдүктүк ааттаппыт хамаандаҕа СӨ үөрэҕин уонна наукатын миниистирэ Владимир Егоров Ил Дархан аатыттан 20 тыһ. солк суумалаах сэртипикээттэри уонна Ил Дархан Харыйатыгар ыҥырыы, оҕолору бэлэмнээбит салайааччыларга, үлэһиттэргэ махтал суруктары туттартаата.
Людмила ПОПОВА, “Саха сирэ” хаһыат.
СӨ үөрэҕин уонна наукатын министиэристибэтин пресс-сулууспатын хаартыскалара туһанылыннылар.