Булчут күнэ быйыл Саха сиригэр бэһис төгүлүн бэлиэтэннэ. СӨ баһылыга Егор Борисов манна туһааннаах Ыйааҕы 2012 сыллаахха таһаарбыта. Онтон ыла муус устар ый маҥнайгы субуотатыгар киин куоракка, улуустарга, нэһилиэктэргэ өбүгэбит бултуур үгэһин сөргүтүүгэ анаммыт элбэх дьаһал ыытыллар.
Василий НИКИФОРОВ, «Саха сирэ» хаһыат, edersaas.ru
Айылҕа харыстабылын миниистирэ Сахамин Афанасьев П.Ойуунускай аатынан Саха тыйаатырыгар Булчут күнүн түмүктүүр дьоро киэһэҕэ бэлиэтээбитин курдук, бырааһынньык сыл ахсын кэҥээн иһэр. Маннык тэрээһиннэр эдэр булчуттар булт нуормаларын, быраабылаларын билэллэригэр, бултааһын култууратыгар, этикатыгар сысталларыгар, быһата, айылҕаҕа харыстабыллаахтык сыһыаннаһалларыгар төрүт буолаллара саарбаҕа суох.
Тэрийээччилэр ааҕалларынан, Тыа хаһаайыстыбатын академиятын спордун манеһыгар Булчут күнүгэр уонна “Sakha Travel” диэн Туризм нэдиэлэтигэр ананан тардыллыбыт “Саха сиригэр булт уонна туризм” быыстапка-дьаарбаҥкаҕа саамай элбэх киһи сырытта. Быыстапкаҕа 40 кыттааччы бэйэтин табаарын уонна өҥөтүн көрдөрбүтүттэн аҥаара булка сыһыаннаах.
Киин куорат 202-с түөлбэтигэр өрөспүүбүлүкэ улуустарыттан уонна Дьокуускайтан 12 хамаанда ким бастыҥ булчутун быһаарсар тыҥааһыннаах киирсиитэ буолла. Үгэс курдук, булчуттар ойбон аллардылар, кулуһун отуннулар, чэй өрдүлэр, моһоллору туораатылар итиэннэ булт сокуонун, бэрээдэгин-быраабылатын билиигэ тургутустулар. Ити күн иннинэ Намныыр Сыырга бэргэн ытааччылар күрэхтэспиттэригэр Чурапчы “боотурдара” бастакы, мэҥэлэр иккис, Дьокуускай “Лесник” хамаандата үһүс миэстэлэри ылбыттара.
Хомуур түмүгү таһаарыыга Мэҥэ Хаҥалас улууһун “Майа” хамаандата кыайыылааҕынан тахсан, өрөспүүбүлүкэ таһымыгар 21-с төгүлүн ыытыллыбыт “Байанай” булчуттар күрэхтэһиилэрин сүрүн бирииһин – “Буран” көлөнү сүүрдэн барда. Иккис миэстэни Чурапчы улууһун “Боотур” хамаандата эрэллээхтик ылла. Үһүс бириистээх миэстэҕэ Нам улууһун “Үрдэл” хамаандата тигистэ. Онон чулуу булчуттар, син биир булка курдук, дьиэлэригэр илии тутуурдаах, өттүк харалаах тиийдилэр.
Манна сыһыаран эттэххэ, Булчут күнүгэр тоҕооһуннаран, булчуттарга уонна балыксыттарга аналлаах “Байанай” сурунаал тэриллибитэ 15 сылын эрэллээх ааҕааччыларын кытта сэмэйдик бэлиэтээтэ. Дойду регионнарыттан бастакынан Саха сиригэр Булчут күнэ төрүттэнэригэр бу сурунаал өҥөтө улаханын чопчулуур сиэрдээх буолуо. Биир идэлээхтэрбитин айар үлэлэрин бэлиэ түгэнинэн эҕэрдэлиибит уонна ааҕааччыларын кэккэтэ хаҥыы турарыгар, сорсуннаах суруйуулары, байанайдаах айымньылары баҕарабыт.
Василий НИКИФОРОВ, «Саха сирэ» хаһыат, edersaas.ru