«Саха сирэ» хаһыат суруналыыһа В.М.Никифоров-Балаһа Баһылай В.В. Никифоров-Күлүмнүүр аатынан судаарыстыбаннай бириэмийэ лауреатынан буолла.
“Саха сирэ” хаһыат тыа сирин олоҕун сырдатар отделын эрэдээктэрэ Василий Михайлович Никифоров өрөспүүбүлүкэ уопуттаах суруналыыстарыттан биирдэстэрэ.
Бэчээт эйгэтигэр үлэтин кырдьаҕас “Кыым” хаһыат кэрэспэдьиэнинэн саҕалаабыта. Чурапчы улууһунааҕы “Саҥа олох” хаһыакка үлэлээбит сылларыгар айар үлэһит быһыытынан сиппитэ-хоппута, кэрэспэдьиэнтэн эрэдээктэр эбээһинэһин толорооччуга тиийэ үүммүтэ. Ааҕааччы кини тыа хаһаайыстыбатыгар ырыынак сыһыаннаһыыта киириитигэр, тыа сирин кыһалҕаларыгар анаммыт дириҥ хорутуулаах ыстатыйаларын тута сэҥээрбитэ. Хаһыатчыт суруйууларын дьоруойдарынан өрөспүүбүлүкэҕэ биир бастакынан бааһынай хаһаайыстыбаларын, дьоҕус кэтэх предприятиелары тэрийбит дьон буолбуттара.
1995 сыллаахтан Василий Никифоров “Саха сирэ” өрөспүүбүлүкэтээҕи хаһыакка таһаарыылаахтык үлэлиир. Күн бүгүн эрэдээксийэ биир сүрүн отделын – тыа сирин олоҕун сырдатар отделы — салайар. Кини — суруналыыстыка бары жанрын дэгиттэрдик баһылаабыт хаһыатчыт. Тыа сирин бүгүҥҥү үлэтин-хамнаһын, олоҕун эттээн-эллээн көрдөрөр, ырытар ыстатыйалара, тыын суолталаах тиэмэлэргэ бэлиэтээһиннэрэ уу сахалыы суруллууларынан, кыһалҕаны быһаарыыга суруналыыс тус санаатын үллэстэринэн уратылаахтар.
2005 сыллаахха экономиканы сайыннарыыны сырдатыыга “Саха сирэ” хаһыат СӨ бэрэсидьиэнин гранын ылбыта. Ити ситиһиигэ Василий Никифоров тус кылаата улахан.
В.М. Никифоров – өрөспүүбүлүкэ култууратын үтүөлээх үлэһитэ, суруналыыстар “Кыһыл көмүс бөрүө”, Прокопий Караканов аатынан өрөспүүбүлүкэтээҕи бириэмийэлэрин лауреата, “Дьиэ кэргэн экономикатын бастыҥ сырдатыы уонна пропагандалааһын иһин” (2001 с.), “Тыа сирин кыһалҕаларын бастыҥ сырдатыы иһин” (тыа сирин социальнай, экономическай сайыннарыыга бэрэсидьиэн бырагырааматын олоххо киллэриигэ анаммыт суруйууларын иһин (2002, 2003 сс.) өрөспүүбүлүкэтээҕи куонкурустар,“Агро-СМИ-2004” Бүттүүн Арассыыйатааҕы куонкурус кыайыылаахтара.
Эдэр хаһыатчыттар холобур туттар аҕа табаарыстара, чугас доҕотторугар Балаһа Баһылайынан биллэр Василий Михайлович билигин айар үлэтин үгэнигэр сылдьар, ааҕааччыларын инникитин даҕаны толкуйдатар, дириҥ хорутуулаах суруйууларынан сэҥээрдиэ буоллаҕа.
Саха Өрөспүүбүлүкэтин Ил Дарханын 2016 сыл ахсынньы 26 күнүнээҕи Ыйааҕынан саха суруналыыстыкатын сайыннарыыга итиэннэ тыа сирин социальнай, экономическай сайдыытын боппуруостарын сырдатыыга сүҥкэн кылаатын иһин суруналыыстыка эйгэтигэр 2016 сыл түмүгүнэн В.В.Никифоров-Күлүмнүүр аатынан Саха Өрөспүүбүлүкэтин Судаарыстыбаннай бириэмийэтэ “Сахамедиа” медиахолдинг “Саха сирэ” хаһыатын отделын эрэдээктэрэ Василий Михайлович Никифоровка анаммытын биһиги, бииргэ үлэлиир дьоно, өрө көтөҕүллэн, үөрэ иһиттибит, соторутааҕыта 95 сылын бэлиэтээбит хаһыаппыт иллээх кэлэктиибин биир дьоһун ситиһиитинэн ылынныбыт.
Василий Михайловичка айымньылаах үлэтигэр саҥа үрдэллэри дабайарыгар, чэгиэн доруобуйаны, дьиэ кэргэнигэр дьолу-соргуну баҕарабыт.