Балаҕан ыйын 25 — алтынньы 1 күннэригэр Саха Өрөспүүбүлүкэтигэр Классическай муусука нэдиэлэтэ ыытыллыаҕа.

Алтынньы 1 күнүгэр аан дойду үрдүнэн Муусука күнэ бэлиэтэнэр. Онон сибээстээн, Муусука нэдиэлэтэ биһиги өрөспүүбүлүкэбитигэр “Муусука — барыбытыгар” бырайыак иһинэн ыытыллыаҕа. edersaas.ru

Соторутааҕыта Дьокуускайга буолан ааспыт “Искусство деятеллэрэ оҕолорго” сүбэ мунньах бэбиэскэтигэр Муусука күнүн көрсө өрөспүүбүлүкэҕэ бу Нэдиэлэни хайдах ыытыы туһунан боппуруос киэҥник дьүүллэһилиннэ.

СӨ Судаарыстыбаннай сүбэһитин М.Е.Николаев референэ Андрей Дедюкин:

—Олох көрдөрөрүнэн, оҕо, үүнэр ыччат өйө-санаата сайдарыгар  муусука, искусство улахан көмөлөөх. Ол да иһин 2013 сылтан саҕалаан биһиэхэ “Муусука — барыбытыгар”  бырайыак үлэлиир. Бары билэрбит курдук, бу бырайыагы көҕүлээччинэн СӨ Бастакы Бэрэсидьиэнэ Михаил Николаев буолар. Бырайыак олоххо киллэриллиитигэр үгүс үлэ, тэрээһин ыытыллар.

Эһиил 2018 сыл бэс ыйын 27-от ыйын 5 күннэригэр биһиги өрөспүүбүлүкэбитигэр Норуоттар икки ардыларнааҕы оҕо муусукаалынай куонкуруһа буолара былааннанар. Ити курдук, араас интэриэһинэй, үрдүк таһымнаах бырайыактар бааллар. Оттон алтынньы 1 күнүгэр Дьокуускайга “Кыайыы 50 сыла”  спорт дыбарыаһыгар Муусука аан дойдутааҕы күнүгэр аналлаах, духобуой оркестрдар, хор кэлэктииптэрэ кыттыылаах өрөспүүбүлүкэтээҕи тэрээһин ыытыллыаҕа. Ол курдук, “Фанфары Туймааде!” духобуой оркестрдар марш-парадтарыгар Галина Михайловна Кривошапко аатынан Судаарыстыбаннай филармония,  Марк Николаевич Жирков аатынан Муусукаалынай колледж, Василий Афанасьевич Босиков аатынан Муусука үрдүкү оскуолатын, Майатааҕы, Чурапчытааҕы ДШИ-лэр духобуой оркестрдара, кадеттар оскуолаларын иитиллээччилэрэ, Бэрдьигэстээх, Мохсоҕоллоох, Майа ДШИ-лэрин флейтистэрэ, Дьокуускай, Жатай оскуолаларын, Чурапчытааҕы ДШИ, Опера уонна балет тыйаатырын хордара, ХИФУ, Сахациркэ кэлэктииптэрэ кыттыахтара. Балаҕан ыйын 29 күнүгэр “Виват музыке!”  теле-араадьыйа эфирэ буолуоҕа. Ити курдук, Муусука нэдиэлэтэ биһиэхэ киэҥ хабааннаахтык ыытыллыаҕа.

Классическай муусука нэдиэлэтин кэмигэр өрөспүүбүлүкэ оскуолаларыгар биллиилээх муусукааннары, искусство деятеллэрин, преподавателлэри, артыыстары кытта көрсүһүүлэр, кылаас чаастара  буолуталыахтара. Маны таһынан оскуолаларга чуораан тыаһын классическай муусуканан солбуйарга, алтынньы 1 күнүгэр (кыаллар буоллаҕына нэдиэлэ устата) куорат оптуобустарыгар классическай муусуканы холбуурга, Муусука аан дойдутааҕы күнүн туһунан иһитиннэрии оҥорорго этии киирдэ.

Татьяна МАРКОВА, «Саха сирэ» хаһыат, edersaas.ru