Балаҕан ыйыгар Дьокуускайга улуу тириэньэр Дмитрий Коркин кэриэһигэр Гран-при турнир ыытыллар
Быйыл балаҕан ыйын 5 күнүгэр өрөспүүбүлүкэ уопсастыбаннаһа Саха АССР, РСФСР, ССРС үтүөлээх тириэньэрэ Дмитрий Петрович Коркин төрөөбүтэ 90 сыла киэҥник бэлиэтиэҕэ. Бу кэрэ-бэлиэ даатаны көрсө Дьокуускайга балаҕан ыйын 5-8 күннэригэр Тустуу холбоһуктаах эйгэтин (United World Wrestling) халандаарыгар киллэриллибит улуу тириэньэр кэриэһигэр көҥүл тустууга XI норуоттар икки ардыларынааҕы турнир ыытыллыаҕа.
edersaas.ru
Бырабыыталыстыбаҕа буолбут мунньахха спорт миниистирэ Георгий Балакшин 50 омук судаарыстыбатыгар күрэхтэһиигэ ыҥырыы ыытыллыбытын иһитиннэрдэ. Күн бүгүн Афганистан, Армения, Венгрия, Германия, Испания, Колумбия, Соҕуруу Корея, Латвия, АХШ, Турция, Эквадор, Япония, Кытай итиэннэ Монголия хамаандалара Дьокуускай түһүлгэтигэр кытталларын бигэргэтэн олороллор.
Норуоттар икки ардыларынааҕы турнир иитинэн, балаҕан ыйын 4-5 күннэригэр судьуйаларга куурустар ыытыллыахтара, күрэхтэһии иннинэ Чурапчытааҕы физкультурнай институкка “Д.П. Коркин кылааһа” үөрүүлээх быһыыга-майгыга аһыллыаҕа.
Атырдьах уонна балаҕан ыйдарыгар өрөспүүбүлүкэтээҕи, улуустардааҕы бэчээт уонна электроннай СМИ-лэр, “Саха” НКИХ, “Тэтим” араадьыйа уонна “Якутия 24” ханаал Дмитрий Коркин үбүлүөйүгэр анаммыт тэрээһиннэри киэҥник сырдатыахтара. “Саха” НКИХ “Триумф” Спорт кииниттэн турнир хаамыытын быһа эфиринэн көрдөрүөҕэ. Күрэхтэһии күннэригэр “Спорт Якутии” хаһыат эрэдээксийэтэ Турнир күннүктэрин бэлэмнээн таһаарыаҕа.
Роман Попов, «Саха сирэ» хаһыат, edersaas.ru