Арктика дьыалаларыгар Судаарыстыбаннай кэмитиэт бэрэссэдээтэ Прокопий Николаев Ил Дархан иһинэн Арктика сэбиэтигэр уонна төрүт олохтоох хотугу аҕыйах ахсааннаах омуктар Ассоциацияларын сүрүннүүр сүбэтигэр «2014-2017 сс. уонна 2020 сылга диэри Арктика уонна хотугу улуустар социальнай-экономическай сайдыылара» бырагырааманан ыытыллар үлэ туһунан иһитиннэрии оҥордо.
edersaas.ru
Балык хаһаайыстыбатын комплексын сайыннарыы чэрчитинэн балык хаһаайыстыбаларын базатын хаҥатыыга, саҥа технологиянан хааччыйыыга ааспыт сылга 69,5 мөл солк. көрүллүбүт. Бу үпкэ тирэҕирэн, биир улахан булуус оҥоһулубут, үс булуус саҥардыллыбыт, үс улахан тиэхиньикэ, биэс тоҥорор тэрил, биир катер-рефрижератор ылыллыбыттар. Ону таһынан түөрт балык базатын тутуу үбүлэммит.
Балык салаатыгар сүрүннээн сэттэ хотугу улуус: Усуйаана, Булуҥ, Аллайыаха, Аллараа Халыма, Абый, Орто Халыма уонна Эдьигээн идэтийэн үлэлииллэр. Ааспыт сыл устата барыта холбоон 4,4 тыһ. туонна балыгы соҕотуопкалаан, былааннарын 108,2 % толорбуттар. Итинтэн сайыҥҥы өттүгэр 880 туоннаны туттарбыттар, “Саха сирин балыга” диэн үгэс буолан эрэр өрөспүүбүлүкэтээҕи быыстапка-дьаарбаҥкаларга 60 туонна балыгы батарбыттар. Оттон балыгы астааһыҥҥа былаан 5,5 %-нан аһара толоруллубут. Быйыл бу кирбиини намтаппат сорук турар эбит.
Раиса СИБИРЯКОВА, “Саха сирэ”, edersaas.ru