Быйыл күһүн 31 улууска уонна үгүс нэһилиэккэ баһылыктар быыбардара буолуохтаах. 2014 с. муниципальнай быыбарга “барыларын утарабын” диэн графа киирэн биэрбитэ. Ол эрээри быйыл кэлэн итини уларытаары гыналлар.
Аграфена КУЗЬМИНА, edersaas.ru
Быыбар киин кэмитиэтин бэрэссэдээтэлин солбуйааччы Александр Власов бэҕэһээ баһылыктар семинар-мунньахтарыгар бэлиэтээбитинэн, бу маны уларытар туһунан этиини парламеҥҥа номнуо киллэрбиттэр. «Биһиги уонна Тверь уобалаһа эрэ бу манан туһанан олоробут. Парламеҥҥа бу графаны суох оҥорорго этии киллэрбиппит. Ол эрээри манна икки санаа баар. Парламент хайдах быһаарарыттан тутулуктаах буолуоҕа», — диир кини.
Александр Власов этэрэ сөп. Биир өттүнэн, быыбардааччылар баһылык дуоһунаһыгар сөптөөх кандидат турбата дии саныыр буоллахтарына, иккиһин быыбары ыытан, бэйэлэригэр сөптөөх киһини талан ылалларыгар кыаҕы биэрэр. Ол эрээри сорох ардыгар бу манан туһанан быыбары ыһан, талыллыахтаах да киһини талбакка хаалар түгэннэрэ эмиэ баар.
Быыбар иккиһин ыытылларыгар муниципальнай бүддьүөттэн харчы барар. Онон икки өттүн үөрэтэн көрөн баран быһаарыныыны ылар тоҕоостоох. Итини дьокутааттар быһаарыахтара. Маны таһынан, Александр Власов баһылыктарга туһаайан быыбардааччылар испииһэктэрин хонтуруоллуурга эттэ. Кистэл буолбатах, испииһэги бэрэбиэркэлээбэттэн сорох ардыгар испииһэккэ анараа дойдуга аттаммыт дьон киирэн хаалаллара эмиэ баар. Манан туһанан быыбардааччы ахсаанын элбэтээччи да дьон көстөр.
Дакылаатын түмүгэр Александр Васильевич быыбары тэрийиигэ, ыытыыга, бастакы уочарат, баһылыктар эппиэтинэһи сүгэллэрин санатта. Быыбар быйыл балаҕан ыйын 18 күнүгэр ыытыллыаҕа.
Аграфена КУЗЬМИНА, «Саха сирэ» хаһыат, edersaas.ru