Өлүөхүмэ оройуонун Өлүөхүмэ куоратыгар уонна Сунтаар улууһун Сиэйэ нэһилиэгэр олохтоохтор баһылыкка турбут хандьыдааттары барыларын утаран, быыбар иккиһин ыытыллар буолла.
Аграфена КУЗЬМИНА, “Саха сирэ” хаһыат, edersaas.ru.
Сунтаар
Сунтаар улууһугар тоҕус нэһилиэккэ баһылык быыбара ыытыллыбыта. Сиэйэ баһылыгын быыбарыгар барыта үс хандьыдаат турбута. “Биир ньыгыл Россияттан” Сунтаар улууһун баһылыгын көмөлөһөөччүтүнэн үлэлии сылдьыбыт Тимур Иванов регистрацияланан баран бүтэһик эргииргэ кэлэн туораан хаалбыта.
Онон, «бэйэлэрэ туруоруммуттар» нэһилиэк баһылыгынан үлэлии олорбут Алексей Обоюков уонна баһаарынай чаас начальнига Александр Романов иккиэн илин-кэлин түһүспүттэрэ. Ол эрээри быыбардааччылар 46,63 % (152 куолас) “барыларын утарабын” диэн графаны талан, хайаларын да баһылыгынан көрбөттөрүн биллэрдилэр. Алексей Обоюковка 110, Александр Романовка 55 куолаһы биэрбиттэрэ.
Өлүөхүмэ
Оттон Өлүөхүмэ куоракка быыбар хамыыһыйатыгар сэттэ хандьыдаат докумуонун туттарбытыттан куорат урукку баһылыга Василий Сафонов “Биир ньыгыл Россияттан” туран баран, салгыы киирсибэтэҕэ, ону сэргэ Солянка нэһилиэгин баһылыгынан үлэлии олорбут Альбина Масина регистрацияны ааһан баран, бүтэһик эргииргэ кэлэн эмиэ туораан хаалбыта. Онон биэс хандьыдаат Наталья Антонова (18,76 %), Ларина Гуринова (13,20 %), Юрий Клюцев (11,53 %), Анатолий Шаповалов (5,82 %), Виталий Новоселов (3,56 %) киирсибиттэрэ. Ол эрээри 1154 киһи (ити быыбардааччылар 42,79 % ылар) барыларын утарда.
Онон бу муниципальнай тэриллиилэргэ быыбар хаттаан буолуоҕа. Бу быыбардары муниципальнай тэриллиилэр бэйэлэрин үптэринэн уйунуохтара.
Аграфена КУЗЬМИНА, “Саха сирэ” хаһыат, edersaas.ru.