close
Бастакы ыал 6%-наах ипотеканы ылла
· - Олох-дьаһах - Саха ыала

Бастакы ыал 6%-наах ипотеканы ылла

Дойду үрдүнэн бааннар чэпчэтиилээх ипотеканы биэрэн эрэллэр. Дьокуускйага Нохсоровтар дьиэ кэргэттэрэ Арассыыйаҕа биир бастакынан 6%-наах ипотеканы оҥортордо. Сбербаан пресс-сулууспата иһитиннэрэринэн, кинилэр баан Байкааллааҕы филиалыгар бастакынан, Арассыыйаҕа үсүһүнэн чэпчэтиилээх ипотеканы ылбыттар.

Үс оҕолоох эдэр ыал иллэрээ сыл тутуллубут “Зеленый остров” диэн комплекска («Утум+» тутар хампаанньа) дьиэ ылбыттар. Бу комплекс куорат кииниттэн тэйиччи соҕус, күөх оттоох-мастаах сиргэ турар, оонньуур былаһааккалар, уһуйаан уонна оскуола чугас баар буолан, кыра оҕолоох дьон олохсуйалларыгар табыгастаах.

Бу 6%-наах ипотеканы биэрэр туһунан Владимир Путин сэтинньигэ эппит этиитэ олоххо киирдэ. Ол чэрчитинэн, 2018 сыл тохсунньу 1 күнүттэн төрөөбүт иккис, үһүс оҕоҕо маннык субсидиялаах ипотеканы биэрэллэр. Субсидия болдьоҕо иккис оҕоҕо — 3 сыл, үһүскэ — 5 сыл. Бу болдьох кэнниттэн 9,5% буолар (ол эрээри, бу бырыһыан кыччыан сөп, өскөтүн кэлин Киин Баан кыччатаҕына). Холобур, иккис оҕолоругар ылбыттарын кэннэ, үһүс оҕолоннохторуна, болдьохторо уһаан биэрэр.

Бу бырагырааманан тутулла турар уонна “иккис ырыынак” дьиэлэриттэн ылыахха сөп. Бастакы усунуос – дьиэ сыанатыттан 20%. Саха сиригэр кирэдьиит муҥутуур улахан суумата – 3 мөлүйүөн.

Кэргэнниилэр кыттыгас ылааччы (созаемщик) буолаллар. Манна кэргэнин сааһа, хас оҕолооҕо, төлүүр-төлөөбөт кыахтааҕа оруола суох. Пааралар сокуонунан холбоһо илик буоллахтарына, тохсунньу 1 күнүн кэнниттэн төрөөбүт иккис, үһүс оҕо төрөппүтэ кыттыгас ылааччы (созаемщик) буолар кыахтаах. Атыылаһыллар дьиэ уонна сүрүн заемщик олоҕо, доруобуйата страховкаланара булгуччулаах.

Урут ылбыт ипотекалаах ыалларга иккис, үһүс оҕолоро төрөөтөҕүнэ, бырыһыаннарын кыччаттарыахтарын сөп. Ол эрээри, хомойуох иһин, төрдүс, бэһис оҕоҕо бу бырагыраама үлэлээбэт.

Ангелина Васильева, “Саха сирэ” хаһыат, edersaas.ru

 

#бүгүн: 1
1
1

Сайт матырыйаалларын ааптар көҥүлэ суох ылар бобуллар.

Мин санаам:

одиннадцать + 15 =