Уус Алдан улууһун I Хоро нэһилиэгэр Пионерия күнэ дирбиэннээхтик ыытыллан, дьон-сэргэ сүргэтэ көтөҕүллэн сылдьар. Бу туһунан биһиэхэ Олег Кошевой аатынан 80-с дружина ыстаарсай баһаатайа Сталина Данилова кэпсээтэ.
— Педагогическай үлэ бэтэрээнэ, СӨ үөрэҕириитин туйгуна, пионерскай хамсааһын бэтэрээнэ, Хоро уонна 1 Хоро нэһилиэктэрин бочуоттаах олохтооҕо, улууска бэпэчиитэллэр хамсааһыннарын бастыҥа Клара Афанасьевна Неустроева кэриэһигэр улууспут 30-80 сыллардааҕы пионердара, пионербаһаатайдара, оҕо-аймах билиҥҥи хамсааһынын активистара, уопсайа 200 киһи кыттыылаах сүлүөт үрдүк таһымнаахтык буолла. Тэрээһиҥҥэ нэһиликтэртэн оҕо саас чаҕылхай кэмнэрин санаан, ахтан ааһаары урукку пионердар тоҕо анньан кэлэн көхтөөхтүк кытыннылар. Далааһыннаах тэрээһини 80-с сыллардааҕы пионер баһаатайдар көҕүлээтилэр.
Кини бу пионербаһаатайдар кэнчээри ыччаты иитиигэ-үөрэтиигэ олоҕун анаабыт, 70-с сылларга чаҕылхайдык үлэлээбит Чараҥ орто оскуолатын В.Н.Мигалкин аатынан пионерскай дружина пионер баһаатайын К.А.Неустроеваны үйэтитиигэ былааннаах үлэни саҕалаабыттарын туһунан бэлиэтээн этэр. Тэрээһини тэрийиигэ Клара Афанасьевна дьиэ кэргэнэ, Чараҥ оскуолата, И.И.Находкин аатынан сынньалаҥ киинэ, В.Н.Протодьяконов-Кулантай аатынан литературнай мусуой төһүү күүс буолбуттар.
— Сарсыардаттан үөрүүлээх сборга уруккулуу горн, барабаан тыаһынан араас сыллардааҕы пионердар хаамтылар, ыллаан ньиргиттилэр. Этэрээт бэрэссэдээтэллэрин аатыттан 70-с сылларга пионербаһаатайдаабыт Анна Прокопьевна Бурнашева дружина сэбиэтин бэрэссэдээтэлигэр Клара Афанасьевна кыыһыгар Айна Ивановна Неустроеваҕа рапордаата. Ол кэнниттэн дружина бэрэссэдээтэлэ бу оскуолаҕа 80-с с. пионербаһаатайдаабыт Светлана Михайловнаҕа рапорын туттарыыта 30-с сыл анараа өттүнээҕи история хатыланыыта буолан улаханнык долгутта. Оччотооҕуга Айна Неустроева дружина сэбиэтин бэрэссэдээтэлэ, Светлана Михайловна — пионербаһаатай эбиттэр. Салгыы Знамяны киллэрии, гимнэри истии, Чараҥ оскуолатын үөрэнээччилэрин эҕэрдэтэ биир тыынынан үөрүүлээхтик барда. Долгутуулаах түгэнинэн 30-50 сс.пионердартан 10 киһини бочуоттаах пионерга ылыы уонна алта киһини бочуоттаах пионер баһаатайга ылыы буолла.
Бу күн күндү ыалдьыттарынан Уһун Күөл орто оскуолатын пионерскай этэрээтэ, аатырбыт-сураҕырбыт «Кэнчээри» ансамбль буоллулар. Сбор кэнниттэн Клара Афанасьевна олоҕун, үлэтин бииргэ үлэлээбит, алтыспыт чугас дьоно ахтан-санаан аастылар. Дириҥ ис хоһоонноох мусуой үлэтин литературнай мусуой дириэктэрэ Зоя Васильевна Мигалкина сырдатта.
Тэрээһин иккис чааһа хатыҥ чараҥ быыһыгар турар Нэлээн диэн сиргэ, П.А.Ойуунускай 1936 с. ыһыахха кэлэ сылдьан пионердары кытары көрсүбүт сиригэр — сир кырсын быһан оҥорбут Сулустарыгар буолла. Манна Мүрү алаас иһинээҕи оскуолалар үөрэнээччилэрин билиҥҥи оҕо хамсааһынын тэрилтэлэрэ бэйэлэрин тустарынан кэпсээһиннэрэ, аҕа саастаах көлүөнэ байаанынан урукку пионер ырыаларын ыллаан доргутуулара олус көхтөөхтүк ыытылынна.
Долгутуулаах бэлиэ күн үһүс чааһа Чараҥнааҕы сынньалаҥ киинигэр ыытылынна. Манна нэһилиэк художественнай самодеятельноһын кыттыылаахтара бэртээхэй эҕэрдэ кэнсиэрдэрэ буолла. Клара Афанасьевна кэргэнэ Иван Иванович Неустроев, кыыһа Айна Ивановна күндү киһилэрин аатын үйэтитиигэ хаалтыс, значок, буклет, сувенир оҥотторон аҕалан сүлүөт кыттыылаахтарыгар өйдөбүнньүк быһыытынан бэлэх ууннулар.
Биһиги корр., «Саха сирэ» хаһыат, edersaas.ru