Бу күннэргэ Сунтаарга Устьеҕа «Тещин Язык» диэн сиргэ улуус баһылыгын бирииһигэр Боотурдар күрэхтэрэ ыытылынна. Күрэххэ, уопсайа, 15 хамаанда күөн көрүстэ.
Анивера Акимова, «Саха сирэ» хаһыат, https://edersaas.ru/
Сунтаар тэрилтэлэрин итиэннэ Тойбохой, Хадан, Наахара, Илимниир, Сиэйэ, Элгээйи, Бордоҥ, Устье, Маар Күөл, Түбэй Дьаархан нэһилиэктэрин хамаандаларын боотурдара бастыыр иһин илин-кэлин түһүстүлэр. Тэрээһини улуус дьаһалтатын ыччакка уонна спорка салаалара иилээн-саҕалаан ыыттылар.
Көрөөччүлэр киэҥ биһирэбиллэрин ылбыт күрэхтэһии туһунан edersaas.ru сайтка улуус баһылыгын көмөлөһөөччүтэ Тимур Иванов маннык кэпсээтэ:
– Күрэх биэс түһүмэҕинэн ыытылынна. Ол курдук, эстафета, гиирэ көтөҕүүтэ, балык былдьаһыыта, хомуур хапсаҕай, канаат тардыһыыта. Тыҥааһыннаах күрэхтэһии түмүгүнэн, Маар Күөл хамаандата эрэллээхтик бастаата. Иккис бочуоттаах миэстэни Сиэйэ, үһүс миэстэни Сунтаар сэлиэнньэтин колледжын хамаандата ыллылар. Былырыыҥҥы күрэх кыайыылааҕа, Сиэйэ бөҕөһө Ньургун Иванов абсолютнай чөмпүйүөн аатын ылан, МР-155 саа хаһаайынынан буолла.
Боотурдар күрэхтэрин улуус олохтоохторо эрэ буолбакка, ыаллыы сытар Ньурбаттан кэлбит ыалдьыттар эмиэ улаханнык сэҥээрэн, маннык хабааннаах күрэхтэһиини эр дьоҥҥо анаан регионнааҕы таһымнаах оҥоруохха сөбүн эппиттэр.
Анивера Акимова, «Саха сирэ» хаһыат, https://edersaas.ru/