Бу күннэргэ Уфаҕа түмүктэммит оҕунан ытыыга эдэрдэр ортолоругар Арассыыйаҕа бастыыр иһин күрэхтэһиигэ Ньургустаана Федотова салайааччылаах Саха сирин сүүмэрдэммит хамаандата кыайыы көтөллөннө.
Ол курдук, уолаттарга классическай оххо Алексей Михайлов (олимпийскай эрэл училищета, тириэньэрэ А.М. Филатов), Ян Константинов (4 №-дээх ДЮСШ, тириэньэрэ Б.Б. Олесов), Евгений Белоусов (Миирнэй, тириэньэрэ Р.Л. Рязанскай) кыһыл көмүс мэтээл хаһаайыннарынан буоллулар. Финалга кинилэр Башкирия хамаандатын 6:2 ахсаанынан баһыйдылар.
Оттон кыргыттарга Юлия Маркова (Хаҥаластааҕы ДЮСШ, тириэньэрэ М.А. Алексеев),Сардаана Жиркова (олимпийскай эрэл училищета, тириэньэрэ А.Н. Тимофеев), Нария Саввина (Тааттатааҕы ДЮСШ, тириэньэрэ Г.Л. Павлова) састааптаах Саха сирин хамаандата үһүс миэстэҕэ таҕыста.
Маны сэргэ «блочнай ох» дивизиоҥҥа Юлия Маркова үрүҥ көмүс, Сардаана Жиркова боруонса мэтээл хаһаайкаларынан буоллулар.
Бу күрэхтэһии түмүгүнэн быйыл Грецияҕа ыытыллар Европаҕа бастыыр иһин күрэскэ кыттар хамаанда сүүмэрдэниэҕэ.
Роман ПОПОВ, «Саха сирэ» хаһыат, edersaas.ru