Бу күннэргэ Алдаҥҥа, быйылгы Олоҥхо ыһыаҕын сүрүн күрэһин чыпчаал кыайыылааҕынан буолбут Чурапчы олоҥхоһутугар Николай Григорьевка Кылаан бирииһин – “Лада” массыынатын туттардылар.
Бааттаах бастыҥ олоҥхоһукка Lada 4х4 Urban массыына күлүүһүн үөрүүлээх быһыыга-майгыга Алдан улууһун баһылыга Северин Поздняков туттарда. Умнуллубат тэрээһиҥҥэ баһылыгы социальнай боппуруостарга солбуйааччы Игорь Сахно, Култуура управлениетын салайааччы Анастасия Помалейко кыттыыны ыллылар диэн иһитиннэрэр “Алдан оройуона” МТ пресс-сулууспата.
Николай Никитич Григорьев – Чурапчы улууһун Чакыр сэлиэнньэтин олохтооҕо, бааһынай хаһаайыстыба салайааччыта.
Өрөспүүбүлүкэ биллиилээх олоҥхоһута, тойуксута, оһуохай таһаарааччыта. Тыйаатырга туруоруллар олоҥхолорго сүрүн партиялары толорор. Кини “Кылыһах” фольклорнай ансаамбыл чилиэнэ.
Николай Никитич эдэр эрдэҕиттэн уус-уран самодеятельность бастыҥ кыттыылааҕа, көхтөөх уопсастыбанньык, сцена бэтэрээнэ. Чакыр нэһилиэгин Ытык киһитэ. Айылҕаттан талаанын сайыннаран, олоҥхолоон, ыллаан-туойан, дьонугар-сэргэтигэр үгүс үөрүүлээх түгэннэри бэлэхтээн, сыралаах үлэтэ сыаналаммытынан истиҥник эҕэрдэлиибит!
Татьяна МАРКОВА, “Саха сирэ” хаһыат, edersaas.ru