Саха сиригэр «Мин сэлиэнньэм—2017» өрөспүүбүлүкэтээҕи уопсастыбаннай видео-куонкурус биллэриллибитэ. Куонкуруһу быйыл үөрэх, медицина, култуура уонна искусство салааларыгар «Норуот билиниитэ» уопсастыбаннай бириэмийэни олохтообут WWWHYPERLINK портал ыыппыта.
Куонкурус СӨ уопсастыбаннай балаататын, «Саха» Национальнай көрдөрөр-иһитиннэрэр хампаанньа, гражданскай көҕүлээһиннэри сайыннарыыга «Нэһилиэк» бырайыак» уопсастыбаннай тэрилтэ өйөбүллэринэн барда.
Ахсынньы 15-20 күннэригэр ZOOMA.TOP порталга оройуоннарынан куонкурус финалистарын быһаарыыга куоластааһын ыытыллыбыта.
Дьүүллүүр сүбэни «Нэһилиэк» бырайыак» уопсастыбаннай тэрилтэ салайааччыта Гавриил Семенов салайда. «Оҕолорго үтүө санааны» бырайыак салайааччыта, продюсер, СӨ култууратын туйгуна Антон Иванов уонна «Мин сэлиэнньэм» куонкурус ааптара Семен Посельскай үлэлээтилэр.
Дьүүллүүр сүбэ быһаарыыта маннык буолла:
1 миэстэ – Евгения Николаевна Попова уонна Юлия Аркадьевна Яковлева – «Алгыстаах дойдубут – Абаҕа» видеоларынан (Амма улууһун Абаҕа с.).
2 миэстэ – Лена Борисовна Чойнова уонна Раиса Алексеевна Кириллина (Сунтаар улууһун Хадан с.);
3 миэстэ — Игнатий Копырин (Булуҥ улууһун Найба с.).
«Норуот билиниитэ» анал номинация кыайыылааҕынан Айаал Евдокимов «Мин төрөөбүтм Үөһээ Бүлүүм улууһа» үлэтинэн буолла.
Кыайыылаахтары эҕэрдэлээһин олунньу 26 күнүгэр буолуоҕа.
Семен Посельскай — бырайыак ааптара:
-Куонкурус сыала-соруга – тыа сирин олоҕун сырдатыы. Үүнэр көлүөнэҕэ уонна ыччакка өрөспүүбүлүкэҕэ олорор норуоттар үгэстэрин уонна духуобунай култуураларыгар убаастабыллаах сыһыаны иитии, тыа сирин нэһилиэктэрин историяларын уонна Саха сирэ сайдыытыгар оруолларын үөрэтии итиэннэ тарҕатыы.
Надежда ЕГОРОВА, «Саха сирэ» хаһыат, edersaas.ru