«Саха сирин киэн туттуута» бириэмийэ «Үлэ киһитэ» номинацията түмүктэнэн, аны «Спортсмен» номинация кыттыылаахтарын сүүмэрдээһин саҕаланна.
edersaas.ru
Сайаапкалары ылыы кулун тутар 26 күнүттэн муус устар 4 күнүгэр диэри ыытыллыаҕа. Куонкуруска кыттааччылар 18 саастарыттан үөһэ, Саха сиригэр олорор, өрөспүүбүлүкэ, дойду уонна норуоттар икки ардыларынааҕы таһымнаах спортивнай күрэхтэһиилэргэ кыттар, «спорт маастарыгар хандьыдаат» спортивнай ааттан намыһах буолуо суохтаах.
Куонкуруска кыттыы туһунан докумуону спортсменнар бэйэлэрэ, табаарыстара, уопсастыбаннай түмсүүлэр, спортоскуолалар, училищелар, спорт управлениелара түһэрэллэр.
Муус устар 9 күнүттэн муус устар 13 күнүгэр диэри куоластааһын ыытыллыаҕа. Муус устар 16 күнүттэн финалистары талар куоластааһын буолуоҕа. Кыайыылаах муус устар 20 күнүгэр биллиэҕэ.
Дьэ, онон кытаатыҥ, «Спортсмен» номинацияҕа кыттарга сайаапкаларгытын биэриҥ. «Саха сирэ киэн туттуута» бочуоттаах бириэмийэҕэ актыыбынай кыттыыны ылыҥ. Сотору кэминэн хандьыдааккыт өрөспүүбүлүкэ киэн туттуутунан буоларыгар «күөх уоту» уматыҥ!
Елена ПОТОЦКАЯ, «Саха сирэ» хаһыат, «edersaas.ru