Бастыҥ спортсмены суруналыыстар талаллара ордук

Ааптар: 
Бөлөххө киир:

Сыл бастыҥ спортсменнарын быһаарыы, “Чөмпүйүөннэр бааллара”, Саҥа дьыллааҕы бырааһынньыктар тигинээн аастылар. Бу тэрээһиннэр араас өйдөбүлү хааллардылар. Хаһан баҕарар буоларыныы, сыл бастыҥ спортсменнарын талыыга араас санаалар үөскүүллэр. Сөбүлээбэт, сөпсөспөт да өрүттэр суох буолбатахтар. Онно үксүгэр суруналыыстар буруйдаах, кинилэр билбэтэх, сатаан сыаналаабатах аатыраллар.

“Хас киһи баар да – оччо санаа баар” дииллэр. Ол гынан баран, бу балаһыанньаҕа уопсай биир түмүккэ, сиэрдээх санааҕа кэлиэххэ сөп этэ.

Хаһан, ханна да буоларыныы, спорка сыл бастыҥнарын спортивнай суруналыыстар быһаараллар. Оттон биһиэхэ тоҕо эрэ оннук буолбатах. Онон, санаабын суруйарга сананным. Өссө Госкомспорт эрдэҕиттэн, тоҕо эрэ спортивнай суруналыыстар быһаарыыларыгар эрэммэккэ, сыл бастыҥ спортсменнарын талыыга Спорт министиэристибэтин иһинэн анал хамыыһыйа үлэлиир. Онно министиэристибэ, Үрдүкү спортивнай маастарыстыба оскуолатын эппиэттээх үлэһиттэрэ, спорт салайааччылара, спорт инстутуттарын ректордара уонна спортивнай суруналыыстар, барыта отучча киһи киирэр. Кинилэр бастыҥ спортсменнары ыйбыттарын кэннэ, үс киһиттэн састааптаах анал бөлөх туспа хоско киирэн куоластары ааҕан нөҥүө күнүгэр, эбэтэр “Чөмпүйүөннэр баалларыгар” тиийэн биирдэ быһаарар. Дьиҥэ, маннык түгэҥҥэ куоластааһын аһаҕас буолара ордук этэ. Этэргэ дылы, дьыала иһэ хараҥа.

Сыл түмүгүнэн бастыҥнары талыыга өссө биир түгэн, үгэс быһыытынан уон чулуулар кэккэлэригэр онус киһинэн спорт национальнай көрүҥүн киһитэ киирэр. Онуоха 2016 сыл түмүгүнэн лауреатынан Дыгын оонньуутун кыайыылааҕа Егор Филиппов ааттанна. Оттон мин санаабар, мас-рестлиҥҥэ Европа уонна аан дойду чөмпүйүөнэ, Россия призера Анатолий Баишев бастыҥынан ааҕыллыахтаах этэ. Бу түгэҥҥэ тоҕо эрэ Саха сирин иһинээҕи Дыгын оонньуута – Россия, Европа, аан дойду чөмпүйэнээттэринээҕэр үрдүктүк сыаналаммыта хайдах даҕаны өйдөммөт.

Инникитин өрөспүүбүлүкэ бастыҥ спортсменнарын син эмиэ аан дойдуга курдук, спортивнай суруналыыстар эрэ талыахтарын баҕарабын. Кинилэргэ итэҕэйиэххэ, кинилэргэ эрэниэххэ. Оттон сөпсөспөт буоллахха, баһаалыста, ханнык баҕарар министиэристибэ, ханнык баҕарар түмсүү, оннооҕор хаһыат бэйэтин бастыҥнарын төһө баҕарар таллын, чиэстээтин.

Маны спорду таптааччылар туох дии саныыгыт?

Петр ПАВЛОВ, «Саха сирэ» хаһыат, edersaas.ru

Владислав КОРОТОВ хаартыскаҕа түһэриитэ. 

+1
0
+1
0
+1
0
+1
0
+1
0
+1
0
+1
0