Ааспыт ыйга «Саха сирин киэн туттуута» норуот бириэмийэтин «Үлэ киһитэ» номинацията түмүктэнэн, аны бастыҥтан бастыҥы талар «Спортсмен» номинацияҕа куоластааһын биллэриллибитэ.
Бастыҥ спортсмены талыыга уопсайа 5500 куолас киирдэ. Барыллааһын түмүгүнэн биэс финалист аата билиннэ. Кинилэр кимнээҕий?
— Егор Пономарев, Чурапчы улууһа, Арассыыйа чөмпүйүөнэ, көҥүл тустуу — 1370 куолас, онтон 566 — социальнай ситимнэргэ.
— Игнат Андросов, Таатта улууһа, Кытайга ыытыллыбыт норуоттар икки ардыларынааҕы турнирдар кыайыылаахтара, көҥүл тустуу — 958 куолас, онтон 611 —социальнай ситимнэргэ.
— Ирина Севрюк, Томпо улууһа, РФ спордун маастара, мас-рестлинг, армлифтинг — 839 куолас, онтон 409 — социальнай ситимнэргэ.
— Сардана Осипова, Нам улууһа, 2018 сыллааҕы Эйэ Кубогын хаһаайката, мас-рестлинг — 666 куолас, онтон 353 — социальнай ситимнэргэ.
— Руслан Пахомов, Сунтаар улууһа, любителлэргэ Классическай саахымат аан дойдутааҕы чемпионатын 3-с призера — 607 куолас, онтон 98 — социальнай ситимнэргэ.
Уопсайа 18 улуустан 25 сайаапка киирдэ. Түмүк куоластары бүтэһиктээх ааҕыы кэнниттэн кэлэр нэдиэлэҕэ биллиэҕэ.
«Саха сирин киэн туттуута» куонкурус 2017 сыл алтынньы ыйтан саҕаланыаҕыттан, быйыл кулун тутарга диэри бары номинаннарга 259342 куолас киирдэ. Саамай элбэх куолас «Быраас» номинацияҕа киирбитэ — 97 028. 279 киһи анал номинация кыттыылааҕынан буолла. Аны өссө түөрт номинация иһин күөн көрсүү хаалла.
«Саха сирин киэн туттуута» бириэмийэ тэрийээччилэрэ — «Сахамедиа» холдинг: «Якутия» уонна «Саха Сирэ» хаһыаттар, «СИА» уонна «Эдэр саас» электронннай таһаарыылар. Бириэмийэ генеральнай партнера — саха национальнай иһитин оҥорор «Көмүлүөк» хампаанньа.
Елена ПОТОЦКАЯ, «Саха сирэ» хаһыат, edersaas.ru
Хаартыска — СИА.