Бэнидиэнньиккэ, СӨ Спорка министиэристибэтин эппиэттээх үлэһиттэрэ, спорт тэрилтэлэрин салайааччылара, Дьокуускайдааҕы уонна Чурапчытааҕы физическэй култуура уонна спорт институттарын ректордара уонна спорду сырдатар суруналыыстар мустан, сыл уон бастыҥ спортсменнарыгар куоластарын биэрбиттэрэ. Кинилэр спорт көрүҥнэринэн федерациялар киллэрбит сайаапкаларын ырытан, хас биирдиилэрэ бэйэлэрэ бастыҥ спортсменнарын талбыттара.
Дьэ онон, ол куоластааһын түмүгүнэн сарсын “Триумф” спорка бэлэмнэнии киинигэр Саха сирин 2016 сыл спорка түмүктэрин таһаарар Чөмпүйүөннэр баалларыгар өрөспүүбүлүкэ уон чулуу спортсменынан кимнээх буолбуттара биллиэҕэ.
Оттон “Саха сирэ” хаһыат бэйэтин көрүүтүгэр, 2016 сыл бастыҥ спортсменнарынан буоллулар:
Виктор Лебедев – көҥүл тустууга РФ спордун үтүөлээх маастара. Иван Ярыгин аатынан норуоттар икки ардыларынааҕы Гран-при турнир 61 кг ыйааһыҥҥа үһүс призера, Россия чөмпүйүөнэ, XXXI сайыҥҥы Олимпийскай оонньуу кыттыылааҕа. Тренерэ – СӨ үтүөлээх тренерэ Иван Дмитриев.
Василий Егоров – бокска РФ спордун үтүөлээх маастара. XXXI сайыҥҥы Олимпийскай оонньуу кыттыылааҕа. Россия чөмпүйүөнэ. Тренерэ – РФ, СӨ үтүөлээх тренерэ Артур Пахомов.
Сардаана Трофимова – чэпчэки атлетикаҕа РФ спордун норуоттар икки ардыларынааҕы кылаастаах маастара. Марафоҥҥа Россия кубогын кыайыылааҕа. “Европа-Азия” норуоттар икки ардыларынааҕы турнирга бастакы миэстэлээх. Тренерэ – СӨ физическэй култуураҕа уонна спорка туйгуна Татьяна Жиркова.
Айаал Лазарев – көҥүл тустууга норуоттар икки ардыларынааҕы кылаастаах спорт маастара. Ыарахан ыйааһыҥҥа Азия чөмпүйэнээтин боруонса призера. XXXI сайыҥҥы Олимпийскай оонньуу кыттыылааҕа. Тренерэ – РФ, СӨ үтүөлээх тренерэ Иван Сивцев.
Виктор Рассадин – көҥүл тустууга РФ спордун норуоттар икки ардыларынааҕы кылаастаах маастара. Устудьуоннарга Россия уонна аан дойду чөмпүйүөнэ. Аан дойду кубогар хамаанданан иккис миэстэлээх. Россия чөмпүйэнээтин үрүҥ көмүс призера.
Егор Пономарев – көҥүл тустууга РФ спордун маастара. Александр Медведь бирииһигэр норуоттар икки ардыларынааҕы турнир боруонса призера. Россия чөмпүйүөнэ. Дмитрий Коркин аатынан норуоттар икки ардыларынааҕы турнир кыайыылааҕа. Тренерэ – СӨ үтүөлээх тренерэ Владимир Кириллин.
Розалина Тимофеева – оҕунан ытыыга РФ спордун маастарыгар хандьыдаат. Европа уонна Россия кубогын кыайыылааҕа. Россия чөмпүйээнээтигэр хамаанданан үһүс миэстэлээх. Аан дойду күрэхтэһиитигэр хамаанданан боруонса мэтээллээх. Тренерэ – СӨ үтүөлээх тренерэ Анатолий Тимофеев.
Николай Стручков – дуобакка международнай гроссмейстер. Россия чөмпүйэнээтин боруонса призера. Европа чөмпүйүөнэ. Тренерэ – РФ, СӨ үтүөлээх тренерэ Василий Кононов.
Айаал Макаров – спортиҥҥа РФ спордун норуоттар икки ардыларынааҕы кылаастаах маастара. Компакт-спортиҥҥа Европа чөмпүйэнээтин боруонса призера. Улахан спортиҥҥа Европа чөмпүйэнээтигэр хамаанданан үһүс миэстэлээх.
Анатолий Баишев – мас-рестлиҥҥэ РФ спордун маастара. Россия чөмпүйэнээтин үрүҥ көмүс призера. Европа уонна аан дойду чөмпүйүөнэ.
“Саха сирэ” хаһыат редакцията.