Үгэс быһыытынан, бу рубрикабытын салгыыбыт. Сыыйа-баайа, аан дойду, Россия, Саха сирин үрдүнэн улахан таһымнаах күрэхтэһиилэр сыллааҕы календарь быһыытынан ыытыллаллара үксээн иһэр. Онно биһиги спортсменнарбыт эриэ-дэхси көрдөрүүлэри ситистилэр.
Петр ПАВЛОВ, “Саха сирэ”, www.edersaas.ru
Олортон таһымнарынан көрөн сыаналаатахха, Үөһээ Бүлүү бухатыыра Увар Тимофеев иккис сылын субуруччу “Хаҥалас хапсаҕайа” өрөспүүбүлүкэтээҕи турнир муҥутуур кыайыылааҕын аатын ылла. Егор Скрябин, Валерий Чемпосов, Василий Стрекаловскай – Дьокуускайга ыытыллыбыт дьүлэй спортсменнарга Россия чөмпүйүөннэринэн буоллулар. Чэпчэки атлеттарбыт Россия чөмпүйэнээтигэр үрдүк ситиһиилэннилэр. Ол курдук, Наталья Леонтьева 5000 м дистанцияҕа тэҥнээҕин булбата, оттон Максим Афонин дьаадыраны быраҕыыга бастаата. Охчуттарбыт эмиэ эриэ-дэхси көрдөрүүлэннилэр. Лондоннааҕы-2012 Олимпиада кыттыылааҕа Кристина Устинова биирдиилээн уонна хамаанданан күрэхтэһиигэ боруонса мэтээллэри ылары ситистэ. Оттон Михаил Филатов, Асим Попов, Павел Мартынов састааптаах Саха сирин хамаандата Россия кубогар бастакы миэстэҕэ таҕыста. Биир биллэр спортсменкабыт Зоя Исаева боксаҕа Уһук Илин федеральнай уокурук чөмпүйэнээтигэр кыһыл көмүс мэтээлинэн наҕараадаланна…
Аны олунньу 25 күнүгэр “Триумф” Спорка бэлэмнэнии киинигэр Ил Дархан кубогар аныгы панкратиоҥҥа норуоттар икки ардыларынааҕы турнирга биһиги спортсменнарбытыттан Борис Игнатьев, Руслан Сивцев, Алексей Пасторов, Петр Егоров, Казимир Захаров, Мичил Осипов, Григорий Попов кыайыыны ситиһэн, Ил Дархан кубогын хаһаайыттарынан буоллулар. Бу күрэхтэһии саамай быһаарыылаах уонна күүтүүлээх киирсиитигэр Григорий Попов Корея байыаһын эрэллээхтик хотон, Азия чөмпүйүөнүнэн буолла. Онон “Саха сирэ” хаһыат спорка отделын быһаарыытынан, олунньу ый бастыҥ спортсменынан Григорий Попову таллыбыт.
Мантан аллараа кулун тутар ыйга өрөспүүбүлүкэҕэ ханнык cүрүн күрэхтэһиилэр буолалларын билиһиннэрэбит (ыытыллар болдьохторугар уларыйыылар баар буолуохтарын сөп).
01-05.03. Гиирэ спордугар өрөспүүбүлүкэ чөмпүйэнээтэ. Чурапчы.
01-05.03. Хотугу многоборьеҕа өрөспүүбүлүкэ чөмпүйэнээтэ. Дьокуускай.
03-04.03. А.И.Донской кэриэһигэр остуол оонньууларыгар Саха сирин чөмпүйэнээтэ. Дьокуускай.
03-05.03. Р.М.Дмитриев кэриэһигэр көҥүл тустууга норуоттар икки ардыларынааҕы турнир. Дьокуускай.
02-05.03. Нуучча дуобатыгар өрөспүүбүлүкэ чөмпүйэнээтэ. Дьокуускай.
09-12.03. Баскетболга өрөспүүбүлүкэ чөмпүйэнээтэ. Дьокуускай.
13.03. В.Г.Степанов кэриэһигэр самбоҕа өрөспүүбүлүкэ чөмпүйэнээтэ. Дьокуускай.
17-19.03. Н.Н.Тарскай кэриэһигэр көҥүл тустууга Саха сирин чөмпүйэнээтэ. Сунтаар.
18-19.03. Фитнес-аэробикаҕа өрөспүүбүлүкэ чөмпүйэнээтэ. Дьокуускай.
18-19.03. Булкаастаах киирсиилэргэ (ММА) өрөспүүбүлүкэ чөмпүйэнээтэ. Дьокуускай.
22-26.03. А.Петров кэриэһигэр боксаҕа Саха сирин чөмпүйэнээтэ. Алдан.
22-27.03. Раллига “Тымныы полюһа” өрөспүүбүлүкэтээҕи чөмпүйэнээт. Дьокуускай – Өймөкөөн.
24-26.03. Сахалыы ыстаныыларга өрөспүүбүлүкэ чөмпүйэнээтэ. Дьокуускай.
25-26.03. П.Е.Алексеев кэриэһигэр хапсаҕайга Саха сирин чөмпүйэнээтэ. Дьокуускай.
25-26.03. Үҥкүү спордугар өрөспүүбүлүкэ чөмпүйэнээтэ. Дьокуускай.
Петр ПАВЛОВ, “Саха сирэ”, www.edersaas.ru
Ааптар хаартыскаҕа түһэриитигэр: панкратиоҥҥа Азия чөмпүйүөнэ, Ил Дархан кубогын хаһаайына – Григорий Попов.