Бэҕэһээҥҥиттэн биир кэлим эксээмэннэр болдьох иннинээҕи түһүмэхтэрэ (досрочные) саҕаланна. Ол курдук, бу түһүмэх кулун тутар 21 күнүттэн муус устар 11 күнүгэр диэри барыаҕа. Бастакы эксээмэннэр география уонна информатика биридимиэттэригэр буоллулар.
Быйыл, эрдэтээҥҥи эксээмэни дойду үрдүнэн 41 тыһ. киһи туттарыаҕа. Саха сиригэр 428 сайаапка киирбитэ. Ити урукку сылларга оскуоланы бүтэрбиттэр уонна араас төрүөтүнэн сайыҥҥы сүрүн түһүмэххэ эксээмэни кыайан туттарар кыахтара суох оскуоланы бүтэрээри сылдьар оҕолор буолаллар.
Арассыыйа үрдүнэн сүрүн түһүмэх иннинээҕи эксээмэни 245 пууҥҥа тутуохтара. Итинтэн Саха сиригэр үс сиргэ – Дьокуускай уонна Мииринэй куораттарга үлэлиэҕэ.
Эксээмэн матырыйаалларын урукку курдук кумааҕынан тиэрдибэккэ, быһаччы эксээмэн барар аудиторияларыгар бэчээттээн таһаараллар. Уонна эксээмэн кэнниттэн үлэлэри миэстэтигэр сканерга түһэрэн бэрэбиэркэҕэ ыыталлар.
Быйылгы эксээмэҥҥэ 5000-тан тахса федеральнай уопсастыбаннай кэтээн көрөөччү сыһыарыллыаҕа. Оттон сүрүн болдьох иннинээҕи түһүмэххэ 1000-тан тахса киһи кэтээн көрүөҕэ.
Рособрнадзор быһа сибээһэ үлэтин салгыыр. Биир кэлим эксээмэн (ЕГЭ) туһунан туох-баар интэриэһиргиир ыйытыыларгытын +7(495)9848919, биир кэлим эксээмэҥҥэ кэһиилэр тахсар түгэннэригэр итэҕэл нүөмэригэр +7(495)1046838 төлөпүөнүнэн биэриэххитин, биллэриэххитин сөп.
Санатан эттэххэ, сайыҥҥы сүрүн эксээмэннэр ыам ыйын 28 күнүттэн саҕаланыахтара.
Людмила ПОПОВА, “Саха сирэ” хаһыат, edersaas.ru