Кулун тутар 12 күнүгэр Кэбээйи улууһун баһылыга Игнатий Спиридонов Дьокуускайдааҕы оттук-энергетика хампаанньатын кытары («ЯТЭК») бииргэ үлэлииргэ Сөбүлэһии түһэристэ.
edersaas.ru
Сөбүлэһии сүрүн соругунан уопсастыба, муниципальнай былаастар уонна «ЯТЭК» кыахтарын уонна күүстэрин түмүү буолар. Ол курдук, үйэ аҥаара кэмтэн ыла гаас промышленноһын кытары сибээстээх Кэбээйи улууһа социальнай бэлиитикэни олоххо киллэриигэ күүскэ үлэлиир улууһунан биллэр.
Улуус баһылыга Игнатий Спиридонов түгэнинэн туһанан, РФ Бэрэсидьиэнэ В.Путин Туһаайыы этиитигэр санааларын үллэһиннэ.
– Владимир Путин Туһаайыы этиитигэр сүрүн санааларын чөкөппүтүн билсэн баран, өрөспүүбүлүкэ чопчу суолу тутуһан үлэлии олорорун өссө төгүл бигэргэтэбин.
Бастатан туран, доруобуйа харыстабылын ылар буоллахха, Ил Дархаммыт Егор Борисов туруорсан, биһиги улууска биир да фельдшер-акушер пууна (ФАП) сабыллыбата. Онон, «Доруобуйа харыстабылын бастакы сүһүөх звенотугар нэһилиэнньэ чахчы чугас буоларын хааччыйыахха, наадалаах сиригэр сөргүтүөххэ наада», – диэн этиитин нэһилиэнньэ үөрэ иһиттэ.
Иккиһинэн, тыа сирин сэлиэнньэлэрин инфраструктура өттүнэн сайыннарыыга, федеральнай уонна региональнай массыына суолларын үбүлээһиҥҥэ болҕомтотун уурбута тыа сирин дьонугар эрэли үөскэтэр. 2017 с. сибээс магистральнай волоконнай-оптическай линиятын тутуу, суол хаһаайыстыбатын саҥардыы уонна чөлүгэр түһэрии, улууһу тырааныспарынан хааччыйыы боппуруостарын СӨ бырабыыталыстыбатын бэрэссэдээтэлэ Евгений Чекины кытары дьүүллэһэн турабыт.
Туох кистэлэ кэлиэй, «биһиги куоласпыт тугу да быһаарбат, наар кэнники кэккэҕэ сылдьабыт» диэн бэйэни сэнэнии сорох дьоҥҥо баар. Итинник толкуйдууллара сыыһатын Туһаайыы этиини ааҕан баран, кэлин да өйдүөхтэрэ дии саныыбын, алта сыллаах кэрчиккэ күүскэ сайдыахтаахпыт. Бэйэни сэнэммэккэ, дойдубутун көмүскүөҕүҥ, Арассыыйаны, Саха Өрөспүүбүлүкэтин салайан олорор баһылыктарбытын харыстыаҕыҥ.
Надежда ЕГОРОВА, «Саха сирэ» хаһыат, edersaas.ru