Бэлэҕи биэрии бэйэтэ быраабылалаах, суруллубатах да буоллар сокуоннаах. Холобур, төрөөбүт да күҥҥэ, урууга, бырааһынньыкка сиэркилэни, чаһыны, уһуктааҕы-биилээҕи бэлэхтиири аньыыргыыллар. Оттон сорохтор, бэлэҕи биэрдэхтэринэ барыта этэҥҥэ буоларын туһугар тугу гынары сүбэлииллэр.
Чаһы
Чаһыны бэлэхтиири аньыыргыыллар. Ордук кырдьаҕас киһиэхэ биэрбэттэр. Киһи бу сиргэ төһө олороро хаалбытын көрдөрө, ааҕа турар дииллэр. Сорохтор чаһыны бэлэхтиир иирсээҥҥэ, арахсыыга диэн этэллэр.
Ол эрээри, кыһыл көмүс чаһыны бэлэхтээтэхтэринэ, аньыырҕаабыт баара биллибэт.
Уһуктааҕы, биилээҕи Уһуктааҕы, биилээҕи булары да, бэлэхтиири да аньыыргыыллар. Дьиэлээх дьон ситиһиитин быһа сотор дииллэр.
Төһөтө кырдьыгын, сымыйатын билбит суох. Ол гынан баран, бэлэхтээтэхтэринэ тимир харчыны утары
уунан биэриэхтээххин диэн сүбэлииллэр.
Сиэркилэ
Сиэркилэни бэлэхтээбэттэр. Былыргыттан сэрэбиэйгэ туттуллар уонна кистэлэҥэ, таабырына элбэх диэн
куттаналлар. Өссө атын эйгэни кытары сибээстиир күүстээх. Оннооҕор, тус бэйэҥ атыылаһар да буоллаххына,
ис сүрэххиттэн сөбүлээбит, киһини сырдатан, тупсаран көрдөрөр эрэ сиэркилэни атыылаһыахтааххын дииллэр. Уопсайынан, сиэркилэ сэрэхтээх.
Чымадаан, суумка, кумааһынньык
Чымадааны бэлэхтиири ббэлэхтиириылыр-былыргыттан аньыыргыыллар. Оннооҕор мал-сал, таҥас-сап да кэмчи кэмигэр. Ордук урууга былыргыттан сөбүлээбэттэр эбит. Арахсыыга дииллэр.
Аныгы үйэҕэ суумканы, кумааһынньыгы, үрүссээги чугас киһиҥ төрөөбүт күнүгэр эбэтэр бырааһынньыкка бэлэхтиэххэ сөп эбитэ буолуо да, быраабылатын тутуһуохтааҕыҥ ирдэнэр. Холобур, кумааһынньык бэлэхтээтэххитинэ, иһигэр бытархай харчылаах буолуохтаах дииллэр. Онтон суумканы, чымадааны бэлэхтиир буоллахха, иһигэр кэмпиэти угуҥ диэн этэллэр.
Медицина тэрилэ
Холобур, хаан баттааһынын мээрэйдииргэ диэн анаан тонометры, о.д.а. медиина тэрилин бэлэхтиири сорохтор сөбүлээбэттэр. Доруобуйа мөлтүүр дииллэр эбит.
Чөмчүүк
Чөмчүүгү төһө да күндүтүк санаабыппыт иһин, русалкалар харахтарын уута диэн ааттаан, бэлэххэ биэрэри
аньыыргыллар эбит. Уопсайынан, үгүс киһи айылҕа тааһыттан оҥоһуллубут киэргэллэри бэлэхтииртэн туттуналлар.
Гороскопка сөп түбэһиэхтээх диэн быһаараллар. Онтон көмүс киэргэли бэлэхтээһини туох да диэн утарбыттарын истибит-билбит суохха дылы.
Иһит-хомуос
Үчүгэй, кырасыабай иһити бэлэх тутартан аккаастаммыт баарын билбэппит. Ол гынан баран, маннык бэлэх
оҥоруоххутун баҕарар буоллаххытына, улахан болҕомтолоох буолуҥ. Иһит бүүс-бүтүҥ буолуохтаах.
Алдьаммыт иһит, олоҕу алдьатар дииллэр эбит. Онуоха урууга бэлэхтэниллибит иһити түргэн соҕустук туттар ордук, онуоха диэри алдьамматын курдук сэрэниэххэ наада буолар диэн быһаараллар.
Аны туран, иһити бэлэхтиир буоллаххытына, иһигэр быыкаа да буолаҕына тугу эмэ угуохтааххыт дииллэр.
Холобур, кэппиэйкэни. Оччоҕуна бэлэхтээбит дьонуҥ баай-талым олохтоох, дэлэгэй астаах буолуохтара.
Ваза
Вазаны бэлэхтиир буоллахха, толору уулаан баран онно сибэкки дьөрбөтө угуҥ диэн суруйаллар. Эбэтэр кэмпиэти толору хаалааҥ, ваза кураанах буолуо суохтаах дииллэр.
Уруучука
Хайдахтаах да кырасыабай, сыаналаах уруучуканы бэлэхтиири сорохтор соччолооботтор. Быһааралларынан, уруучука бэлэҕи ылбыт киһи атын дьон сабыдыалыгар бэринимтиэ, кинилэр этэллэрин истиэр, тылларын ылынар, бэйэтэ туораттан көмөтө суох быһаарыыны ылбат буолар диэн. Бу ордук салайаачыларга сыыһыаннаах.
Хартыына
Хартыына дьайар күүһэ улахан диэн этэллэр. Ол иһин, хартыынаны бэлэхтиир буоллахха, үчүгэй айылҕаны, киһи санаатын көтөҕөрү бэлэхтиэхтээххин дииллэр.
Ким итэҕэйэрэ, итэҕэйбэтэ бэйэтин көҥүлэ. Кылаабынайа, бэлэх ис сүрэхтэн буолуохтаах.
Биһиги корр., «Саха сирэ» хаһыат, edersaas.ru
Хаартыска: интэриниэттэн
+1
+1
1
+1
+1
+1
+1
+1