Бэлисипиэттэри уоруу кэмэ саҕаланна

Ааптар: 
Бөлөххө киир:

Буруйу оҥоруу көрүҥнэринэн «бэргиир» кэмнэрдээх. Ол дьыл кэмиттэн тутулуктаах. Холобура, сааскы-сайыҥҥы ыйдарга уоруу, ол иһигэр, чуолаан бэлисипиэттэри уоруу, элбиир. Онно ханнык да тимир торуос да көмөлөспөт.

Вера МАКАРОВА, «Саха сирэ» хаһыат, https://edersaas.ru/

Номнуо оннук бастакы түбэлтэ тахсыбытын Дьокуускай куорат полициятын пресс-сулууспата иһитиннэрдэ.

Ол курдук, кулун тутар 13 күнүгэр киин куорат 24 саастаах олохтооҕо полицияҕа тыллаабытынан, кини дьиэтин подъеһыттан бэлисипиэтин уорбуттар. 11-13 күннэргэ, чуолкайын билбэт. «Тимир атын» уордаран, 10 тыһ. солк. хоромньуламмыт. Бу чахчынан холуобунай дьыала тэриллибит. Олох көрдөрөрүнэн, бэлисипиэти, үгүс түбэлтэҕэ, тимир торуоһун алдьатан, подъезтан уораллар эбит.

Итинэн сибээстээн, полиция маннык сүбэлэри биэрэр:

1). Бэлисипиэккин көрүүтэ суох хаалларыма. Сүрэҕэлдьээбэккэ-хайаабакка, хаһыс да этээс буоллун, подъезка буолбакка, кыбартыыраҕар киллэрэн туруор.

2). Оттон кылгас да кэмҥэ подъезка туруорарга күһэллэр буоллахха, эрэллээх,  анал күлүүстээх торуоһунан туттар.

3). Маныаха бэлисипиэккин, туттарар сиргин төһө бөҕөтүн бэрэбиэркэлээн эрэ баран, хааллар.

4). Видеокамера баар сиригэр туруорарыҥ өссө эрэбил буолуо этэ.

5). Бэлисипиэккин билбэт киһигэр быстах да бириэмэҕэ туттарыма.

6). «Тимир атыҥ» туох уратылааҕын өйдүү сырыт (өҥө-дьүһүнэ, туох эмит суруга-ойуута, киэргэтиитэ). Оннук ураты бэлиэлэрэ суох буоллаҕына, бэйэҥ тугунан эмит, холобура, сотуллубат кыраасканан бэлиэтээ.

7). Маны таһынан, хас биирдии бэлисипиэт бэйэтэ нүөмэрдээх (арааматыгар). Ону бэлисипиэтиҥ пааспарыгар суруйан биэр.

Вера МАКАРОВА, «Саха сирэ» хаһыат, https://edersaas.ru/

Хаартыска: интернет.

+1
0
+1
0
+1
0
+1
0
+1
0
+1
0
+1
0