СӨ Доруобуйа харыстабылын министиэристибэтин оробуочай бөлөҕө бу күннэргэ Горнай улуугар үлэлээтэ. Миниистир Михаил Охлопков саамай ыраах сытар Солоҕон нэһилиэгэр тиийэ сырытта. Бэрдьигэстээх улууһун киин балыыһатыгар миниистир реанимобилы, флюорография биэрэргэ мэктиэлээтэ.
Надежда ЕГОРОВА, «Саха сирэ» хаһыат, edersaas.ru
Миниистир Михаил Охлопков саамай ыраах сытар Солоҕон нэһилиэгэр тиийэ сырытта. Солоҕон амбулаторията «ыраах сытар, аҕыйах нэһилиэнньэлээх бастыҥ эмтиир тэрилтэнэн» ааттанна. Доруобуйа харыстабылын миниистирэ Михаил Охлопков салайааччылаах бөлөх эмп харайыллар болдьоҕуттан саҕалаан төрөөһүн туһунан сурунаалы толорууга тиийэ бэрэбиэркэлээтэ. Бэрэбиэркэ түмүгүнэн Солоҕон амбулаторията «ыраах сытар, аҕыйах нэһилиэнньэлээх бастыҥ эмтиир тэрилтэнэн» ааттанна. Солоҕон амбулаторията «100 ФАП» судаарыстыбаннай-чааһынай бииргэ үлэлээһиҥҥэ өрөспүүбүлүкэ бырагырааматынан тутуллубута.
Бэрдьигэстээххэ
Ону тэҥэ оробуочай бөлөх Мытаах, Маҕарас, Ааһыма амбулаторияларыгар үлэлээтэ. Түмүккэ Бэрдьигэстээх с. сырытта.
Бэрдьигэстээххэ улуус киин балыыһата аныгы технологиялаах, тупсаҕай тутуулаах, хас да мэндиэмэннээх дьиэлэртэн турар. Чугаһыгар бөртөлүөт түһэр былаһаакката кытта баар. Балыыһа «үтүө санаалаах медицина» тосхоллорун олоххо киллэрэн, баай интерьердээх, инбэлииттэр сылдьалларыгар анал пандустар уонна лифт үлэлиир.
Иллээх-эйэлээх кэлэктиип үлэһиттэрэ үгүстэрэ «Тыа сирин эмчитэ» федеральнай бырагырааманан кэлбит «мөлүйүөннээхтэр» ахсааннарыгар киирсэллэр. Кинилэр үгүс үөрүйэхтээх үрүҥ халааттаах аанньаллары кытары «бастыҥ балыыһаҕа» бииргэ үлэлииллэрин улахан табыллыынан ааҕаллар.
Миниистир М.Охлопков икки күннээх сырыы түмүгүн үлэ кэлэктиибигэр билиһиннэрдэ. Балыыһа объектарын материальнай-техническэй базаларын үрдүктүк сыаналаата. Ону сэргэ кэккэ итэҕэстэргэ тохтоото, ону уталыппакка көннөрөргө эттэ.
Эмчиттэр ыйытыыларыгар министиэристибэ сүрүн отделларын салайааччылара Саргылана Алексеева (былаанныыр-экономика департамена), Анастасия Эверстова (эминэн хааччыйыы отдела) уонна Иван Михайлов (инженернэй отдел) хоруйдаатылар.
Михаил Охлопков улуустааҕы балыыһа кылаабынай бырааһа Геннадий Егоров, үчүгэй хаһаайыстыбанньык быһыытынан, эмтээһин өҥөтө тупсарыгар үчүгэй материальнай-техническэй базаны тэрийбитин сыаналаа. Миниистир маны сэргэ үлэ улахан өттө хас биирдии үлэһиттэн тутулуктааҕын, ситиһиллибитинэн тохтоон хаалбакка, саҥаттан-саҥа соруктары ылынар наадатын бэлиэтээтэ.
Министиэристибэ уочараттаах сырыыта үтүө сонуннаах түмүктэннэ. Ол курдук, миниистир Горнай улууһун эмчиттэригэр «В» кылаастаах реанимобилы, флюорография аныгы аппараатын уонна инфекционнай отделениены, сэллиги эмтиир диспансеры саҥардарга 2 мөл. 500 тыһ. солк сууманы биэрэргэ мэктиэлээтэ.
ЫСПЫРААПКА:
2003 с – улуустааҕы киин балыыһа саҥа комплекса үлэҕэ киирбитэ;
2013 с. – киин балыыһа базатыгар «Доруобуйа киинэ» тэриллибитэ.
2014 с. – эмчиттэри онкология, клиническэй лабораторнай диагностика, дьиэ кэргэн медицината, неонатология салааларыгар үөрэппиттэрэ;
2015 с. – киин балыыһа таһыгар бөртөлүөт былаһакката аһыллыбыта.
Надежда ЕГОРОВА, «Саха сирэ» хаһыат, edersaas.ru