Бэрэбиэркэлиир үлэ түмүгүн өрө тардар оскуолалар испииһэктэрин таһаарыахтара
Бүтүн Арассыыйатааҕы бэрэбиэркэлиир үлэ 2016 сылтан (Всероссийская проверочная работа) киирбитэ. Онно олоҕуран дойду үөрэнээччилэрэ история, география, химия, биология, нуучча тыла, о.д.а. биридимиэттэргэ бэрэбиэркэлиир үлэлэри суруйаллар.
edersaas.ru
Бүтүн Арассыыйатааҕы бэрэбиэркэлиир үлэ (ВПР) биир кэлим эксээмэнтэн (ЕГЭ) уратыта диэн, алын кылаас үөрэнээччилэриттэн саҕалаан ыытыллар итиэннэ Федеральнай судаарыстыбаннай стандарка (ФГОС) олоҕуран, оҕолор билиилэрин таһымын бэрэбиэркэлиир сыаллаах. Бу – биир кэлим эксээмэн буолбатах. Онон манна турбут сыана кылааһы тахсарга, оскуоланы бүтэрэргэ оруолу оонньообот. Ол эрээри, Арассыыйа үөрэҕи уонна науканы кэтээн көрөр тэрилтэтин салайааччыта Сергей Кравцов “Арассыыйа хаһыатыгар” биэрбит интервьютугар, кырдьыга суох, сыаналарын “өрө тардар” (объективнайа суох) түмүктээх оскуолалар испииһэктэрин аһаҕастык суруйуохпут диэн эппит. Бэрэбиэркэлиир үлэлэр түмүктэрин эрэгийиэннэргэ ыыппыттар. “Бэйэбит анаалыс оҥорон баран, туохха болҕомто ууруохха сөбүн ыйдыбыт. Эһиил, өскөтүн “өрө тардыы” тохтообот түгэнигэр оскуолалар ааттарын аһаҕастык ыйыахпыт”, — диэн салайааччы эппит. Быһатын эттэххэ, “хара испииһэккэ” киирбэт туһугар өссө биир “өрө мөхсүү” буолууһу.
Людмила ПОПОВА, “Саха сирэ” хаһыат, edersaas.ru.
Хаартыска интэриниэттэн.