Быйыл “Холбос” потребуопсастыба 100 сылын киэҥник бэлиэтиир. Бу уопсастыба 1918 сыллаахха М.К.Аммосов уонна П.А.Ойуунускай көҕүлээһиннэринэн тэриллибит. Өктөөп өрөбөлүүссүйэтин кэнниттэн тилэх баттаһа тэриллибит атыы-тутуу бөдөҥ тэрилтэтэ Саха сирин нэһилиэнньэтин аһынан-таҥаһынан хааччыйыыга киллэрбит кылаата тугунан да кэмнэммэт.
Мэҥэ Хаҥалас оройуонун II Наахара нэһилиэгэр атыы-эргиэн систиэмэтигэр бэйэлэрин идэлэрин толору баһылаабыт бэрэдэбиэстэр араас сылларга үлэлээн ааспыттара, билигин даҕаны үлэлии сылдьаллар. Кинилэртэн бу суруйуубар Татьяна Николаевна Прокопьева туһунан сырдатыахпын баҕарабын.
Татьяна Николаевна бэрэдэбиэһинэн үлэтин Майатааҕы оскуола-маҕаһыыны 1980 сыллаахха бүтэриэҕиттэн саҕалаабыта. Төрөөбүт Хочотун маҕаһыыныгар үлэлии-үлэлии Дьокуускайдааҕы эргиэн-экэнэмиичэскэй техникуму бүтэрбитэ. 1986 сылтан сэбиэдиссэйинэн ананан, киниэхэ улахан эппиэтинэс сүктэриллибитэ. Наахаратааҕы сельпо маҕаһыына сыллата бэриллибит былаанын ырааҕынан куоһарара, муҥутаан 2002 сыллаахха 163 быр. толорбута. Татьяна Николаевна үлэтигэр үрдүк эппиэтинэстээхтик, ирдэбиллээхтик сыһыаннаһар этэ. Нэһилиэнньэ туохха наадыйарын учуоттаан табаары аҕала турара. Маҕаһыын иһигэр буфет, библиотечка үлэлээбитэ. Паайдаахтары кытары үлэ былааннаахтык ыытыллара.
Бэрэдэбиэс үөрэҕин баһылаары сылдьар устудьуоннар кэлэн практиканы ситиһиилээхтик бараллара.
Т.Н.Прокопьева бэрэдэбиэс идэтин ымпыгын-чымпыгын билэригэр көмөнү оҥорбут наставниктарын В.Н.Адамовы, К.П.Олейникованы, О.М.Кычкинаны, Г.Н.Андрееваны махталлаахтык ахтар.
2003 сыллаахха Татьяна Николаевна бастаан улууһугар Мэҥэ Хаҥаласка, салгыы өрөспүүбүлүкэтээҕи “Холбос” потребсойууһа ыыппыт “Идэтигэр бастыҥ” күөн күрэҕэр кыайыылааҕынан тахсан, Ижевскэй куоракка ыытыллыбыт Бүтүн Арассыыйатааҕы потребкооперация үлэһиттэрин научнай-практическай кэмпириэнсийэтигэр кыттыыны ылбыта.
Үлэтигэр бэриниилээх бэрэдэбиэс Т.Н.Прокопьева биэнсийэҕэ тахсан да баран, Майаҕа Алексеева ИП “Елена” маҕаһыыныгар биэс сыл ситиһиилээхтик үлэлээбитэ. Онтон сиэннэрин көрөн олорбута. Билигин ИП Генеров Н.Н. Хочоҕо арыйбыт маҕаһыыныгар бэрэдэбиэстии сылдьар.
Татьяна Николаевна сыралаах, үтүө суобастаах үлэтэ “РФ эргиэнин туйгуна”, “Россия-Саха сирэ 370 сыла” бэлиэлэринэн, РФ потребкооперациятын Бочуотунай Грамотатынан уо.д.а бэлиэтэммитэ.
Чулуу бэрэдэбиэс Татьяна Прокопьева өр сылларга “Холбос” потребсойуус тиһигэр эҥкилэ суох үлэлээбитин күндүтүк саныыр.
Елена Прокопьева, уопсастыбаннай кэрэспэдьиэн.