“Бэрэсидьиэн куоталаһыыларын” айар куонкуруһугар саха оҕолоро бастаатылар

Ааптар: 
Бөлөххө киир:

Саха сирин үөрэнээччилэрэ Бүтүн Арассыыйатааҕы “Бэрэсидьиэн куоталаһыылара” диэн спортивнай күрэхтэһиигэ, 74 хамаандаттан айар куонкурус түһүмэҕэр бастаатылар. Күрэхтэһии балаҕан ыйын 4-23 күннэригэр Анапа куорат “Смена”  киинин баазатыгар буола турар.

edersaas.ru

Саха Өрөспүүбүлүкэтин аатыттан финалга Наталья Максимова салайааччылаах уонна Татьяна Крылова учууталлаах Дьокуускай куорат национальнай гимназиятын 10 “А” кылааһын үөрэнээччилэрэ (8 уол, 8 кыыс) кытта сылдьаллар.

Биһиги оҕолорбут теоретическэй куонкуруһу эмиэ ааһан, алта хамаанданы сэргэ финалга тахсыбыттара. Уопсай түмүк бүгүн биллэр.

Күрэхтэһии түөрт түһүмэхтээх: оскуола иһинээҕи, муниципальнай, эрэгийиэннээҕи уонна Бүтүн Арассыыйатааҕы.

Кыттааччылар булгуччулаах уонна эбии бырагырааманан куоталаһаллар. Булгуччулаах бырагыраамаҕа спортивнай многоборье, айар уонна теоретическэй куонкурустар, эстафета киирэр. Эбии бырагыраамаҕа бадминтон, баскетбол, мини-футбол, харбааһын, самбо уонна саахымат бааллар.

Тустаах күрэхтэһии үөрэнээччилэр доруобуйаларын бөҕөргөтөр, оҕолор физическэй култууранан уонна спордунан ситимнээхтик дьарыктаналларын көҕүлүүр, бары өттүнэн сайдыылаах оҕону иитэн таһаарар, талааннаах оҕолору чорботор инниттэн сыллата ыытыллар. Сүрүн соруга – чөл олоҕу тарҕатыы, үүнэр көлүөнэни гражданскай уонна патриотическай тыыҥҥа иитии.

Дьокуускай куорат национальнай гимназията үс бастакы түһүмэххэ бастакытын эрэ бастыыр буолбатах. Өрөспүүбүлүкэ аатыттан күрэхтэһиилэргэ хаһыс даҕаны төгүлүн кыттарын бэлиэтиир оруннаах.

СӨ Үөрэҕин уонна наукатын пресс-сулууспата.

+1
0
+1
0
+1
0
+1
0
+1
0
+1
0
+1
0