Ыам ыйын 23 күнүнээҕи туругунан, Орто Халыма улууһун Березовка нэһилиэгин аннынан уу таһыма 1117 см тиийдэ. 34 дьиэ ууга баран, 184 киһи эвакуацияланна, билиҥҥээҥҥэ диэри уу таһыма намтыы илик.
Анивера АКИМОВА, «Саха сирэ» хаһыат, edersaas.ru
Бэҕэһээ, СӨ бырабыыталыстыбатын бэрэссэдээтэлин бастакы солбуйааччы Алексей Колодезников Орто Халыма улууһугар баран, үөскээбит быһыыны-майгыны кытары билистэ. Вице-премьер Березовка олохтоохторун кытары көрсөн, нэһилиэк бары олохтоохторугар 5 тыһ. солкуобайдаах биир кэмнээх көмө оҥоһуллуохтааҕын эттэ. Маны таһынан, халаантан эмсэҕэлээбит дьоҥҥо 10 – 20 тыһ. солк. үбүнэн көмө оҥоһуллуоҕа. Уу таһыма түстэ даҕаны, төһө кээмэйдээх хоромньу тахсыбытын суоттааһын барыахтаах.
«Сахаэнерго» Березовкатааҕы дизельнэй станциятын уу ылан, билигин электростанцияны араардылар. Электричество уотун саппаас источниктан биэрэн олороллор.
Кэбээйи улууһун Кальвицатыгар баар станция эмиэ ууга барар кутталлаах. Ол курдук бүгүҥҥү туругунан, уу таһыма үрдээтэ. Оттон Аллараа Халыма улууһун Андрюшкино уонна Походскай сэлиэнньэлэрин ДЭС-та арыый да үрдүк сиргэ турар буолан, манна куттал суоһаабатын туһунан «Якутскэнерго» ПАУо пресс-сулууспата иһитиннэрдэ.
Анивера АКИМОВА, «Саха сирэ» хаһыат, edersaas.ru