ОНЛАЙН-ТРАНСЛЯЦИЯ: XIX Аан дойдутааҕы ыччат уонна устудьуоннар фестивалларын посолларын кытта көрсүһүү

Сочига буолуохтаах Ыччат уонна устудьуоннар XIX аан дойдутааҕы бэстибээллэригэр бэлэмнэнии үрдүк эппиэтинэстээхтик барар. Бу далааһыннаах киэҥ түһүлгэҕэ кыттарга, тэрийэр хамыыһыйа араас эйгэттэн ыччакка үтүө холобур буолар 17 уопсастыбаннай посолу талла. Бүгүн күнүс 16.00 чааска “Сахамедиа” медиа-киинигэр кинилэри кытта көрсүһүү буолуоҕа. Көрсүһүүгэ кыттыыны ылыахтара:

Антон Гавриилович Васильев, волонтер, «Сыл бастыҥ волонтера-2016» анал аат хаһаайына;

Николай Гаврильевич Бястинов, спорду сырдатар суруналыыс, “Спорт Якутии” хаһыат таһаарааччы эрэдээктэрэ;

Елена Христофоровна Голомарева, аҕыйах ахсааннаах хотугу норуоттар боппуруостарын уонна Арктика дьыалаларын кэмитиэтин бэрэссэдээтэлэ;

Гаврил Семенович Менкяров, Олоҥхо тыйаатырын артыыһа;

Анна Александровна Фомина-Миронова, суруналыыс;

Степан Викторович Порядин, «D.E.T.S.A.T» айар холбоһук резиденэ;

Сергей Олегович Фролкин, мас-рестлиҥҥэ Арассыыйа чөмпүйүөнэ;

Александр Александрович Гренадеров, бодибилдиҥҥа (WFF) аан дойду чөмпүйүөнэ.

ЫСПЫРААПКА:

XIX төгүлүн ыытыллар Аан дойдутааҕы ыччаттар уонна устудьуоннар бэстибээллэрэ алтынньы 14-22 күннэригэр Сочи куоракка ыытыллыаҕа. Бу бэстибээл Арассыыйаҕа үсүһүн буолар, бу иннинэ 1957 уонна 1984 сыллардаахха Москваҕа ыытыллыбыта.

Бэстибээлгэ 150 омук дойдутуттан 20 000 киһи кыттыыны ылара күүтүллэр. Биир былаһааккаҕа араас эйгэттэн эдэр лидердэр түмсүөхтэрэ: ыччат НКО-тун бэрэстэбиитэллэрэ, суруналыыстар, айар үлэһиттэр, спортсменнар, инженердэр, ыччат тэрилтэлэрин салайааччылара, үөрэх кыһаларын уһуйааччылара, устудьуоннар хамсааһыннарын лидердэрэ, учуонайдар уо.д.а. Маны тэҥэ, омук дойдутугар олорон нуучча тылын үөрэтээччилэр уонна чинчийээччилэр мустуохтара.

Ааспыт сыл ахсынньытыгар регионнааҕы бэлэмнэнэр кэмитиэт тэриллибитэ. Бэстибээлгэ Саха Өрөспүүбүлүкэтиттэн  тэрээһиннэргэ көхтөөхтүк кыттар 150 ыччат кыттыыны ылыаҕа.