Саха сирин делегацията аан дойдутааҕы Ыччат бэстибээлигэр бэлэмнэнэр
Бу сыл алтынньытыгар Сочига аан дойдутааҕы ыччат уонна устудьуоннар бэстибээллэрэ буолаары турар. Улахан таһымнаах тэрээһиҥҥэ аан дойду араас муннуктарыттан барыта 200 тыһ. кэриҥэ ыччат кыттара күүтүллэр. Оттон Саха сирин аатыттан 200-чэ кыттааччы бараары бэлэмнэнэ сылдьар. edersaas.ru
Бүгүн, балаҕан ыйын 29 күнүгэр, өрөспүүбүлүкэбитин бэстибээлгэ билиһиннэрэр ыччакка анаан бэлэмниир семинар буолла. Тэрийэр бөлөх ыттааччыларга бэстибээл бэлиэлээх — эйэ холууптаах значогу бэлэхтээтилэр. Саха сирин делегациятын анал форматын эдэр модельер Юрий Лукин дизайнаан оҥорбут хаһыаччыктарын түҥэттилэр. Уолаттар хаһыаччыктарыгар — Саха сирин гербэтэ ойуулаах, оттон кыргыттарга — сахалыы оһуордаах.
Уон күн устата, бэстибээл үлэтин тухары сахалар саха таҥаһын, саха норуотун төрүт дьарыктарын, үгэстэрин көрдөрүөхтэрэ-иһитиннэриэхтэрэ. Маныаха улахан былаһааккаҕа Саха сирин туһунан быыстапка-экспозиция турара былааннанар. Кэлии омуктарга анаан саха спордун төрүт көрүҥүн — мас тардыһыыны алта былаһаакканан биллэр мадьыныларбыт, спортсменнарбыт тиийэн билиһиннэриэхтэрэ, күрэхтэһиилэри тэрийиэхтэрэ.
Ыҥырыылаах лектордар кыттааччыларга бэстибээлгэ тиийэн атын омуктары кытта хайдах билсэ-көрсө, кэпсэтэ сылдьалларын, омук сирдэрин бэлиитикэтин туһунан кылгастык билиһиннэрдилэр. Ол курдук, 1985 сыллаахха Москваҕа буолбут ыччат бэстибээлин кыттыылааҕа Александр Кугаевскай ыалдьыттаата. Кини оччотооҕу бэстибээл бырагырааматын, бэлиэлээх значогун кичэллээхтик харайа сылдьар эбит. «Эһиги иннигитигэр олус улахан эппиэтинэс турар уонна улахан үлэ күүтэр. 1985 сыллаахха Москваҕа буолбут бэстибээлгэ Саха сирин аатыттан уон киһи сылдьыбыта, ол иһигэр мин эмиэ кыттыбытым. Уон күн иһигэр өрө күүрүүлээх үлэ буолбута, элбэх кэпсэтиини ыыппыппыт. Дойдугутун, норуоккутун үчүгэй эрэ өттүттэн көрдөрүөххүт диэн эрэнэбин»,— диэн бэйэтин алгыс тылын ХИФУ финансово-экономическай институтун дириэктэрэ Александр Кугаевскай тиэртэ.
Түмүккэ делегация иллээх уонна биир өйдөөх-санаалаах буоларын туһуттан психологтар трениннары ыыттылар, онон мустубут ыччат бэйэ-бэйэлэрин кытта билсэн-көрсөн, бэстибээлгэ кыттарга бэлэм буоллулар. edersaas.ru
СИА хаартыскаҕа түһэриилэрэ.