Саха Өрөспүүбүлүкэтин Үүнэр көлүөнэ судаарыстыбаннай тыйаатырын 25 сылыгар аналлаах Саха сирин сирин норуодунай артыыһа Алексей Павлов ыытар «Көр-күлүү кустуга» өрөспүүбүлүкэтээҕи бэстибээл-күрэх кыайыылаахтарын ааттара билиннилэр. Гран-при үрдүк аат хаһаайынынын Уус Алдан улууһун «Дьээбэ-хообо» көр-күлүү бөлөҕүттэн Туйаара Стручкова-Огдооччуйа буолла. https://edersaas.ru
Бэстибээл-күрэх көр-күлүү уонна сатира көрүҥнэрин салгыы сайынанар, саҥа толорооччулары таһаарар, көрүҥ иитэр-үөрэтэр суолтатыгар уопсастыбаннас болҕомтотун тардыы, улуустар икки ардыларынан култуурунай сибээһи олохтооһун буолар. Култуура уонна духуобунай сайдыы министиэристибэтэ, Үүнэр көлүөнэ тыйаатыра, Эстрада тыйаатыра тэрийэн ыыттылар.
Күрэхтэһиигэ кыттааччылар (уопсайа 500 сайаапка киирбит) видео устууларын дьүүллүүүр сүбэҕэ ыытан, бастыҥнартан бастыҥнар талылланнар, бэстибээлгэ кытта кэлбиттэр. Ол курдук, Уус Алдантан, Мэҥэ Хаҥаластан, Амматтан, Үөһээ Бүлүүттэн, Горнайтан, Эдьигээнтэн, Дьокуускайтан уо.д.а. кыттааччылар мустан, кулун тутар 31 күнүгэр гала-кэнсиэри ыыттылар. Гран-при үрдүк аатын Уус Алдан күндү күлүүгэ Туйаара Стручкова-Огдооччуйа буолла. Туйаара Огдооччуйа диэн ааты ылынан, эмээхсин олоҕуттан күлүүлээх быһа тардыылары көрдөрөр, кэпсиир.
Манна диэн эттэххэ, Туйаара кэлиҥҥи кэмҥэ бастаап, инстаграм «сулуһа» буолла:
— Мин уон кылаас үөрэхтээхпин.Кыра эрдэхпиттэн ыаллаах оонньурбун, ыллыырбын, үҥкүүлүүрбүн сөбүлүүбүн. «Огдооччуйа буол» диэн миэхэ Аркадий Новиков эппитэ. Дьону күллэрэр уустук, мин дьон үөрэриттэн өссө кынаттанан, айыах-тутуох санаам кэлэр. 2006 сыллаахха кыыһым ыарахан ыарыыга ыалдьа сытан: «Ийээ, эн хайаан даҕаны биллэр-көстөр, дьону күллэрэр, үөрдэр киһи буолуохтааххын», — диэн кэриэһин эппитэ. Оҕом кэриэс тылын толорон, онтон тирэхтэнэн, билиҥҥээҥҥэ диэри үлэлии-хамныы сырыттаҕым… Дьиэбэр-уоппар миигин туох даҕаны туппат, онон сири-дойдуну көрө, дьону үөрдэн, күллэрэн, этэргэ дылы, олохторун уһатан, кэнсиэрдии, гостуруоллуу сылдьабын. Сыанаҕа ааҕар монологтарбын, сыанкаларбын бэйэм суруйабын. Муус устар 2 күнүгэр Саха тыйаатырыгар үс кэнсиэри биэрээри сылдьабын. Дьоммун айар киэһэбэр күүтэбин!
Р.S. Бу өрөбүллэргэ Огдооччуйалыын интервьюну күүтүҥ. https://edersaas.ru