Цифровой технология балысханнык сайдан, күннээҕи олохпутугар күүскэ өтөн киирэн эрэр кэмигэр дьон-сэргэ уус-уран литератураттан тэйбэтин туһугар Саха сиринээҕи С.А. Новгородов аатынан «Бичик» национальнай кыһа ааҕыыны көҕүлүүр араас хабааннаах үлэни ыытар.
Ол курдук, бүтүн Арассыыйаны уонна атын тас дойдулары хабан киэҥ далааһыннаахтык үлэлиир «ЛитРес» диэн электроннай кинигэ бөдөҥ интернет-маҕаһыынын кытта бииргэ үлэлэһии дуогабарыгар илии баттаста. Онон, ханна баҕарар сырыттарбыт, саха литературатын төрүттээччи Өксөкүлээх Өлөксөй суруйууларыттан саҕалаан аныгы кэм биллиилээх суруйааччыларын уус-уран айымньыларыгар, искусствоҕа, култуураҕа, кыраайы үөрэтиигэ сыһыаннаах анал таһаарыыларга, оҕону сайыннарар кинигэлэргэ тиийэ сахалыы, нууччалыы уонна хотугу норуоттар тылларынан электроннай кинигэни хачайдаан ылан ааҕар кыахтаныахпыт.
«ЛитРес» каталогар «Бичик» кыһа 100-тэн тахса кинигэтэ баар буолуоҕа уонна сотору кэминэн сыыйа эбиллэн иһиэҕэ. Ааҕааччы онлайн-маҕаһыынтан уран тыл уустарын Өксөкүлээх Өлөксөй, Алампа, хотугу норуоттар суруйааччыларын Тэки Одулок, Семен Курилов, Окат Бэй, Нулгынэт, саха норуодунай суруйааччыларын Суорун Омоллоон, Күннүк Уурастыырап, Амма Аччыгыйа, Бүөтүр Тобуруокап, Болот Боотур, Семен уонна Софрон Даниловтар, Далан, Николай Лугинов, Наталья Харлампьева, Сэмэн Тумат, Иван Мигалкин, Андрей Кривошапкин, Сэмэн Руфов уо.д.а. айымньыларын булуоҕа. Маны тэҥэ, Тумарча, Наталья Михалева-Сайа, Виктория Габышева, Владислав Авдеев, Иван Иннокентьев, Татьяна Находкина, Галина Нельбисова, Афанасий Гуринов-Арчылан, Евдокия Иринцеева-Огдо, Виталий Егоров уо.д.а. курдук саха дьоно таптаан ааҕар суруйааччыларын айымньылара, Багдарыын Сүлбэ, Борис Неустроев-Мандар Уус, Владимир Пестерев уо.д.а. кыраайы үөрэтэр үлэлэрэ киирдилэр. Сорох кинигэлэри онлайн-ситимҥэ босхо ааҕыахха сөп.
Бу интернет-маҕаһыын көмөтүнэн суруйааччыларбыт, ааптардарбыт дойдубут араас муннуктарыгар уонна тас дойдуларга даҕаны ааҕааччыларын, сүгүрүйээччилэрин булуохтара, дьон-сэргэ Сахабыт сирин норуоттарын тылларын-өстөрүн, култуураларын, олохторун-дьаһахтарын, төрүт үгэстэрин, тыйыс тымныылаах айылҕабыт уратытын, кэрэтин уо.д.а. туһунан элбэҕи билиэхтэрэ.
+1
+1
+1
+1
+1
+1
+1