«Бичик» учуобунньуга наҕараадаҕа тигистэ

Ашхабадка (Туркменистан) ыытыллыбыт норуоттар икки ардыларынааҕы XII быыстапка-дьаарбаҥкаҕа 20 дойдуттан кытыннылар. Манна  Е.Поликарпова, Н.Никитина, Н.Филиппова, В Шишигина оҥорбут «Төрөөбүт литература 5-9 кылаас» («Родная литература с 5 по 9 классы») кинигэлэрэ «Сыл учуобунньуга» номинацияҕа 3-с истиэпэннээх дипломунан наҕараадаланна.

Бу ый 2-3 күннэригэр ыытыллыбыт тэрээһини Туркменистан судаарыстыбаннай издательскай сулууспата уонна Атыы-эргиэн промышленнай палаатата тэрийбиттэр. Манна бэчээт эйгэтигэр үлэлиир 150 бэрэстэбиитэл — издательстволар, суруйааччылар, продюсердар, Австрияттан, Францияттан, Кореяттан, Польшаттан, Ирантан, Румынияттан уо.д.а. дойдулартан тиийэ кэлбиттэр. Арассыыйа уонна Саха сирин аатыттан кыттыбыт «Бичик НКК «Сыл кинигэтэ», «Сыл учуобунньуга», «Оҕо кинигэтэ», «Бастыҥ ааҕар кинигэ», «Бастыҥ киэргэтии», «Научнай-популярнай кинигэ» номинацияларга кыттыбыт.

Бу дьоһун ситиһиинэн «Бичик» НКК дириэктэрэ Август Егоров өрөспүүбүлүкэ бары педагогтарын, СӨ үөрэх министиэристибэтин, управлениетын кэлэктииптэрин, кинигэни оҥорбут ааптардары, ааҕааччылары, бииргэ үлэлиир кэллиэгэлэрин  итиитик-истиҥник эҕэрдэлиир.