Владимир Путин быһа эфиргэ биэнсийэҕэ тахсаары сылдьар дьону үлэттэн ууратыыны, эбэтэр үлэҕэ ылартан аккаастаныыны тохтотуохха диэн этии киллэрбитэ. Маннык түгэҥҥэ үлэни биэрээччи улахан суумаҕа ыстарааптаныахтаах.
Госдуумаҕа бу этиини өйөөтүлэр (бастакы ааҕыыга). РФ вице-премьерэ Татьяна Голикова сокуон барылын оҥорон киллэрбит.
Дьокутааттар РФ Холуобунай кодексыгар уларытыылары киллэрдилэр. Ол чэрчитинэн, биэнсийэҕэ тахсара чугаһаабыт киһини уураттаҕына, үлэни биэрээччи 200 тыһ.солк. диэри ыстарааптанар, эбэтэр 360 чааска диэри күһэлэҥ үлэҕэ ыытыллар. Ол эбэтэр, биэнсийэҕэ тахсара 5 сылтан аҕыйах кэм хаалбыт киһини ууратар сокуонунан бобуллар.
Бу сокуон барылын КПРФ-тан ураты, үс фракция өйөөтө. “Сиэрдээхтэр”, төһө да биэнсийэҕэ тахсар сааһы уһатар сокуону утардаллар, бэрэсидьиэн бу уларытыыта аҕам саастаах дьоҥҥо туһалаах, сокуон өттүттэн көмүскэллээх буолуо диэн билиннилэр.
“Биир ньыгыл Арассыыйа” фракциятын салайааччытын солбуйааччы Андрей Исаев этэринэн, Холуобунай кодекс ыстатыйата сэдэхтик туттуллуохтаах. Тоҕо диэтэр, дакаастыахха наада. Маннык түгэннэр, сүрүннээн, үлэ иниспиэксийэтин нөҥүө быһаарыллан, административнай быраабы кэһиилэр кодекстарын (КоАП) ыстатыйалара туттуллуохтаахтар диэн кини бэлиэтиир.
Маны сэргэ, дьокутааттар Үлэ кодексыгар, “Нэһилиэнньэ дьарыктаах буолуутун туһунан” сокуоҥҥа, Бүддьүөт кодексыгар, Нолуок кодексыгар, Үлэ ноуроттар икки ардыларынааҕы тэрилтэтин 102-с конвенциятыгар эмиэ уларытыылары киллэриэхтээхтэр.
“Судаарыстыба хат дьахталлары, эдэр ийэлэри көмүскүүрүн курдук, биэнсийэҕэ тахсаары сылдьааччылар эмиэ социальнай көмүскэлгэ наадыйаллар”, — диэн Андрей Исаев этэр. Саҥа сокуон чэрчитинэн, биэнсийэҕэ тахсаары сылдьар киһи ханнык эрэ балаһыанньанан үлэтэ суох хаалбыт буоллаҕына, кини икки төгүл үрдүк босуобуйаны ылар. Сиргэ, дьиэҕэ-уокка нолуокка чэпчэтиилэринэн туһанар.
Онон, бу сокуон барыла олоххо киирдэҕинэ, биэнсийэҕэ тахсаары сылдьар дьону үлэттэн ууратыы уонна үлэҕэ ылартан аккаастаныы холуобунай буруйу оҥорууга тэҥнэһиэ.
Ангелина Васильева, «Саха сирэ» хаһыат, edersaas.ru