«Саха сирин киэн туттуута» норуот куоластааһыныгар бастаабыт биэс урбаанньыт бүгүҥҥүттэн, олунньу 12 күнүттэн, туспа куоластааһыҥҥа киирсэр буолла.
edersaas.ru
Бу биэс киһиттэн кыайыылаах олунньу 16 күнүгэр биллиэҕэ. Саха сирин 21 улууһуттан 30 урбаанньыт тыҥааһыннаахтык кииристэ. «Сахамедиа» техническэй сулууспата бэрт кичэллээх бэрэбиэркэни ыытта. Ордук элбэх куолас — 28 тыһыынча СИА сүрүн сирэйигэр киирдэ. Facebook, ВКонтакте уонна Instagram курдук дьон сөбүлээн туһанар социальнай ситимнэригэр эмиэ үгүс киһи куоластаата.
Дьэ, онон кимнээх инники күөҥҥэ таҕыстылар? Ханнык урбаанньыкка элбэх куолас бэрилиннэ?
Руслан Федотов — Амма улууһа. «Руслан» маҕаһыын, Мэҥэ Хаҥалас улууһугар «Лээги» атыы-эргиэн киин салайааччыта. Киниэхэ 5568 куолас киирдэ (274 — социальнай ситим).
Александр Никифоров — Дьокуускай к. «КопирТехСервис» ХЭТ салайааччыта. Киниэхэ — 3173 куолас (163 — социальнай ситим).
Виктория Федорова — Дьокуускай к. «Виктория» миэбэл-салон тиһик, «Victory Clinic» медицинэ клиникатын салайааччыта. Киниэхэ 2819 куолас киирдэ (78 — социальнай ситим).
— Никифор Кутугутов. Таатта улууһа. Ыраах айан суоппара. «Кутугутов Н.Л. ИП» салайааччыта. Киниэхэ — 1848 куолас (1 куолас — социальнай ситим).
— Хачатур Аракелян. Өлүөхүмэ улууһа. «Норд-Строй» ХЭТ салайааччыта. Киниэхэ — 1832 куолас (50 — социальнай ситим).
Куоластааһын бастакы түһүмэҕэр кыттыбыт урбаанньыттарга «Сахамедиа» холдинг «Саха сирин киэн туттуута» бырайыагар актыыбынай кыттыыны ылбыттарыгар барҕа махталбытын тиэрдэбит. Эһиги үлэҕитигэр бэриниигитин, өрөспүүбүлүкэ социальнай-экэнэмиичэскэй сайдыытыгар киллэрэр кылааккытын үгүс киһи сыаналаата.
Бүгүҥҥүттэн бүтэһиктээх туочуканы туруорар куоластааһын саҕаланна.
«Бастыҥ» номинация куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр таба тайаммыт, үлэттэн дьоллонор дьону кэмигэр бэлиэтээн көрүү буолар. Кинилэргэ махтал тылларын саамай күөгэйэр күннэригэр сырыттахтарына этэн үөрдүү.
Бэлиэтээн эттэххэ, «Саха сирин киэн туттуута» бырайыак Саха сирин судаарыстыбаннаһын күнүгэр биллэриллибитэ. Ол курдук, алтынньыга ыытыллыбыт «Бастыҥ учуутал» номинацияҕа Чурапчы оскуолатын учуутала Владислав Кривошапкин, сэтинньигэ — «Ыччат лиидэрэ» номинацияҕа ХИФУ профсойууһун кэмитиэтин салайааччыта Артём Иванов кыайбыттара. Ахсынньыга «Быраас»номинацияҕа кыайыылааҕынан 2 №-дээх өрөспүүбүлүкэтээҕи балыыһа бырааһа Степан Тордуин, оттон «Култуура диэйэтэлэ» номинацияҕа Сунтаарга үҥкүү бөлөҕүн салайар Августина Клакинова бэлиэтэммитэ.
«Саха сирин киэн туттуута» бырайыак «Бастыҥ предприниматель» диэн бэһис номинациятын кыайыылааҕынан ким буолара эһигиттэн тутулуктаах, күндү ааҕааччыларбыт! Бу биэс финалист-урбаанньыттан номинация кыайыылааҕын таларга актыыбынай кыттыыны ылыаххыт диэн эрэнэбит.
Тэрээһин генеральнай партнера — саха национальнай иһитин оҥорор «Көмүлүөк» фирма.
Елена ПОТОЦКАЯ, «Саха сирэ» хаһыат, edersaas.ru