Биэтэс Билээхэп: Эбэбитин харыстыаҕыҥ! (БЛОГ)

Бөлөххө киир:

Алаас оҕото буоламмын, эмис собобун ордоробун, доҕоор. Барахсаны мииннээн, ыһаарылаан да сиирбин сөбүлүүбүн. Хоргуннаах, барбыт миинэ киһиэхэ сэниэ эбэр уратылаах ээ. Онон хайа дойду собото буоларын эндэппэккэ быһаарабын. Ол да гыннар, ырыынакка бараммын күндүөбэй балыгы ылааччыбын. Сыаната да удамыр, аны, ыһаарылаан сырылаттахха, амтана минньигэһин оҕото сыттаҕа. Биэнсийэлээх оҕонньор чыыры, уомулу, муора балыгын баҕардаҕым аайы ылан үссэнэр харчым суох.

Икки-үс сылтан бэттэх, бэрт муокас балаһыанньа үөскээтэ ээ. Ырыынакка үчүгэй, хаачыстыбалаах күндүөбэй кэлбэт буолла. Хайдах эрэ ырыган, кыра баҕайы. Атыыһыттартан ыйыталастахха, хоту өрүстэргэ күндүөбэй аҕыйаабыт үһү дэһэллэр. Ким да дуоннааҕы тугу да булан эппэт.

Соторутааҕыта бырабыыталыстыба отчуота Эдьигээҥҥэ бара сылдьан, олохтоохтору долгутар бу боппуруоска хоруй биэрбит диэни иһиттим. Эдьигээҥҥэ бииргэ үөрэммит табаарыһым Уйбаан олохсуйан олорбута ыраатта. Аныгы үйэ оҕонньотторо, бассааптанан-таймаланан баран, бу кэлин булсан, дөрүн-дөрүн кэпсэтэр буоллубут ээ.

Ол Уйбааным этэринэн, Арктика кэмитиэтин тойоно отчуоттаабыт үһү. Бүгүһүн балык тоҕо сүппүтүн быһаараары, анал үөрэхтээх исписэлиистэр, учуонайдар биригээдэлэрэ тиийэн үлэлээбит. Кинилэр быһаарбыттарынан, Өлүөнэ эбэбитигэр кирдээх ууну тоҕорбут бэрт буолан, тууһа, аһылыга аҕыйаан, күндүөбэй уонна уомул балыктар өрүһү өксөйөн искэхтэрин ыы тахсыбат буолбуттар үһү.

Бу алдьархайы көр. Аанньа буолуо дуо, бүтүн куораттар, сэлиэнньэлэр кирдээх уулара, хиимийэлэрэ эбэҕэ кутулла турбутун кэннэ? Бу үлүгэрдээх тиэхиникэ, үөрэх сайдыбыт үйэтигэр итини ыраастыыр, сөҥөрдөр тоҕо кыаллыбатый? Оннооҕор тыа сиригэр толору хааччыллыыны киллэрдибит диэн арбаналлар даҕаны, хойууларыгар-убаҕастарыгар чачайан, сирдэрин-уоттарын былдьатан эрэр сурахтаахтар. Бөҕү-саҕы ыллахха, биир оннук. Сотору кэминэн бөхпүтүгэр көмүллэр чинчилээхпит…

Куоракка биир ыал холугар баһаам бөх мунньулла охсор. Күн аайы биирдии улахан мөһөөччүгү таһааран быраҕабын. Кумааҕыны эҥин баҕас уматан иһиэх баара… Биирдэ бөх тоҕор сиргэ тахсан, кумааҕылары, хордуоннары уматаары гыммыппар, олбуор харбааччы кэлэн айдааны тардыбыта. Бэлииссийэни эҥин ыҥырыах буолбутугар, дьиэбэр куоппутум, сах сиэтин.

Онон аһатан-сиэтэн олорор эбэлэрбитин, аар айылҕабытын харыстыаҕыҥ, туруорсуоҕуҥ диэн ыҥырабын. Биһиги, олохтоох дьон кыһамматахпытына, ким да кыһаныа суоҕа. Оо, сиэннэрбит, хос сиэннэрбит чөл айылҕаҕа олордоллор ханнык ньии…

+1
0
+1
0
+1
0
+1
0
+1
0
+1
0
+1
0