Биир үтүө күн, өҥүрүк куйаастар өссө түһэ иликтэринэ, дьыалабын ситиһэ баран истим. Атаҕым бара үөрэммитинэн, Бэчээт дьиэтигэр чугаһаатым.
Арай, “Бэрэски сиигин дуо?” – диэн чуор баҕайы куоластаах дьахтар саҥата кулгаахпар чоргуйа түстэ. Баатыгарын, бэркэ эйэргэспит, атаахтаабыт куоластаах… Бай! Ол миэхэ хайа бэйэлээх бэһирдэҕэй, бэрэскинэн хадаҕалаатаҕай диэн, тулабын эргим-ургум көрөбүн. Ким да суохха дылы…
“Таабырын таайтарабын дуо-о?!” – бу сырыыга иккиһин лаппыйан ыйытта, куолаһа чиҥээн эрэр чинчилээх.
“Ээ, сиэн, сиэн… Таайтар,” – диэмэхтээтим, ааһан иһэр дьахталлары кыҥастастым. Барахсаттар, кылбаһан, тоҕо баҕас мааныларай. Ити оҕотун сиэтэн иһэр дьахтар буолуо дуо? Ээ суох, кэбис. Бу аа-дьуо ласпардаталаан иһэр хотун дуу? Бэйи, ол эрээри ким да уулусса ортотугар эргичиҥнии турар оҕонньорго кыһаммат курдук, сүр тиэтэллээхтик ааһа хаама тураллар. Оо, биир отучча сыл эдэрим буоллар!.. Мин да дьахтар аймахха син сирдэрбэт уола хаан этим эбээт. Чэ бэйи, ити хааллын…
Аны туран, дьахтарым тыҥкынас куолаһа атын киһилиин кэпсэтэн киирэн барда. Тугу эрэ элбэҕи кэпсиир да кэпсиир. Дьэ доҕоор, били киһи төбөтүнэн буккуллара диэн маны этэн эрдэхтэрэ! Көстүбэт илиэһэйдэр төбөм иһигэр киирэн кэпсэтэр, саҥалара иһиллэр буолбут диэн, ыксаатым, ийэ-хара көлөһүнүм сарт түстэ. Хайдах гыныахха? Харахпар иирэр бараахха киирэн сытарым көһүннэ. Эмээхсиним барахсан ытаабыт хараҕа тумарык быыһынан көстөн ыларга дылы. Хор, барахсаным, син аһынар, харыстыыр санаалаах эбит ээ! Онон эрдийбиккэ дылы буоллум.
Дьэ, доҕоор, өйбүн-төйбүн булунан, тулабын үчүгэйдик көрүммүтүм – атыы дьиэтин эркинигэр ыйаммыт улахан экраны кытары кэпсэтэ турар эбиппин. Сиргэ силлээтим. Дьэ, буолар да эбит! Куһаҕантан киһи да күлэр. Баатыгарын, эрдэ түөһэйээри гыннаҕым дуу…
Ити кэнниттэн ааһан иһэн, ол экраммын кыҥастаһар буоллум. Тэлэбиисэр диэн сымыйа, бүтүннүү эрэкэлээмэни көрдөрөллөр, харчылаһан эрдэхтэрэ. Үксүгэр киһи иилэн ылбат үлүгэрэ. Киһи саатыах, күрүлүүр күнүс сыгынньах дьахталлары көрдөрөллөр эбээт! Онтулара дьэ, эриллэҥнээн бөҕөлөр, бу улаата илик кыра оҕолор, кырдьаҕастар көрөллөр диэн кыбыстыы суох. Киһи кыһыйыах, саха кыргыттара быһыылаах, саатар билэр дьоммут көрүөхтэрэ диэн сэрэхэчийиини, сааты-сууту умнубут эрэйдээхтэр…
Төһө да ити түүҥҥү кулууптарын эрэкэлээмэлээбиттэрин иһин, куорат килбэйэр киинигэр, күрүлүүр күнүс итинтилэринэн аһара өҥнүө суох этилэр! Арыгыны, пиибэни көрдөрөр бобуллар диэн этэ да, хата, ол дойдуларыгар онтулара үрэх уутунуу суккуллар быһыылаах. Куорат мээрийэтэ, хонтуруоллуур уорганнар тугу көрөн эрэллэрэ буолла?!.