Дьэ, доҕоттоор, быйылгы уу суолун баттаһа, Бокуруоп эрэ иннинэ биэнсийэҕэ тахсыахпар диэри олорбут, үлэлээбит-хамсаабыт ахтылҕаннаах дойдубар — Илин эҥээрбэр тахса сырыттым. Эгилдьитэ-бугулдьута барбакка этиэххэ наада: сөрү диэн сөхтүм, бэри диэн бэккиһээтим, дьулайдым, салынным даҕаны. Бу түөһээҥки эмиэ тугу түөһэн эрэр диэххит да…
Тэргэн аартыгы дабайаат, хайа үрдүгэр, Мэҥэ сириттэн сайдыы хорук тымыра – суол-иис тупсубутун, сырыы-айан кэҥээбитин, сыыдамсыйбытын сөҕө көрдүм. Сахабыт сирин тас өртүгэр тахсар, дойду киинин кытта сибээстиир сүрүн суолбут – Ньиэбэр суола киһи итэҕэйиэ суоҕун курдук тупсубут! Биһиги эдэрбитигэр кураан күҥҥэ-дьылга туох да көстүбэт буола үрүҥ буорунан өрүкүйэ олорбута, ыт баһын саҕа хайыр тааһынан дьапталлыбыта, утарыта аасыһыыга көлөһөлөр анныларыттан тааһынан тамнаммыта, массыына охсуллан рессората тостор, полу-уоһа туура ыстанар аппанан-дьааманан көрө сыппыта ханан да суох. Сымыйалаабыт курдук. Төһөлөөх массыына, матассыыкыл айгыраабыта, алдьаммыта, ньиэрбэ-хаан бараммыта буолуой, бу суолга… Бэйэм курдук кырдьыбыттар, сааһырбыттар эрэйдээхтэр билээхтээн эрдэхтэрэ.
Сайдыы диэн бу буоллаҕа. Кэҥэтиллибит, көннөрүллүбүт, аспаалламмыт, бөҕө-таҕа муосталаммыт, сурук-бичик, бэлиэ-туһах бөҕө суолунан аныгы дьон, аныгы массыыналар үөрэ-көтө, ыллыы-туойа айанныыллар. Киһи да, тиэхиньикэ да олоҕо уһуура мантан саҕаланар буоллаҕа.
Остуол ньуурун курдук аспаал суолунан чааска 100 биэрэстэттэн тахсанан куһуурдан иһэн, этэн эттэххэ, үрүүмпэлэри, ыстакааннары үмүөрүтэн, дьалкыппакка-долгуппакка Арассыыйа муҥур тойонун Пуутуну даҕаны кыбыстыбакка хайа баҕарар күндүлүөххэ сөп курдук. Москуба да суола-ииһэ мантан ордубатаҕа чахчы.
Ол гынан баран, үчүгэй суолунан сиэри таһынан түргэнник, «харах тэстэринэн» быччаһыталларыттан, суолга кутталлаах быһыыны-майгыны үөскэтэллэриттэн салынным, дьулайдым. Утары иһэр, биримээнэ буойас курдук субуруйбут ыраах сырыы массыыналара субу-субу аттыгынан саба баттыах, көлүөһэлэрин анныгар эҕирийэн ылыах айыылаах салгыны өрө ытыйан, күөнтээн сири-халлааны бүөлээн, ньирилээн-сирилээн ааһаллар. Кыра массыына эрэйдээх салгын хамсааһыныттан дьаалатынан хайбараҥнаан ылар. Уруулга саҥа олорбут, уопута суох бадьыытал муҥнаах ыгылыйыах, сыыһа-халты туттуох да курдук. Ордук ардах-хаар, сиппэрэҥ кэмигэр инчэҕэй аспаал халтархай, кутталлаах буолар. Манныгы этэн эрдэхтэрэ, үчүгэй куһаҕана суох буолбат диэн.
Кырдьаҕас киһи толкуйбунан, ГАИ үлэһиттэрэ Ньиэбэр суолунан сырыыны кытаанах хонтуруолга ыллахтарына сатаныыһы. Тоҕоостоох миэстэлэргэ устар хаамыралары, сырыы түргэнин кээмэйдиир прибордары туруортаан, кэтээн көрүөхтээхтэр. Гаастарын аһара «тимиригэр диэри» үктүүр суоппардары Аллараа Бэстээххэ тохтотон ботуччу соҕустук ыстарааптыахха. Иккитэ-үстэ сиэптэрин тэбэттэхтэринэ, Ньиэбэр суолун «шумахердара» кэм тардынаа инилэр. Кылаабынайа, дэҥ-оһол тахсара бохсуллуо этэ.
Биэтэс Билээхэп, «Саха сирэ» хаһыат, edersaas.ru