Биэтэс Билээхэп: Сүрэҕэ суох сүүс сүбэлээх

Бөлөххө киир:

Эбэбит туран-туран баран, дьэ, баран эрэр ээ. Буоларын курдук, халлаанын оонньотон, тыалыран, ардахтаан ылла. Быйыл наһаа халааннаабакка, этэҥҥэ аастар. Ол эрээри, дьэ, уута аҕыйах дииллэр. Угут дьыллар ааһаннар, курааммыт төттөрү кэлэн эрэр дуу диэн, кырдьаҕас киһи, дьаахханыах курдукпун…
Ааспыт өрөбүллэргэ уолум аах айылҕаҕа тахсан сынньанабыт диэн, эмээхсин биһиккини мырааҥҥа көһөрөн илтилэр. Бүлүүлүүр суол үрдүнээҕи мырааҥҥа бэртээхэй сынньанар сири оҥорбуттар эбит. Хата, эргийэн да буоллар, массыына үөһэ тахсар буолан, эмээхсин биһикки абыранныбыт. Тахсарга кирилиэс кытта оҥорбуттар дииллэр. Дьэ, киһи бөҕө! Буолумуна, бачча үчүгэй күҥҥэ айылҕаҕа сылдьыбакка, дьиэҕэ хаайтаран олоруоҥ дуо?
Аһыыр сирдэри оҥорбуттар, оннооҕор оҕолорго анаан кыыллар бааллар. Көрөллөр-истэллэр, хомуйаллар быһыылаах, ыраас баҕайы. Дьон киртиппэт буолбуттара дуу? Ол эрээри, көрбөт сирдэригэр бөҕүн хаалларааччы ханна барыай?
Эмээхсиним айылҕаҕа тахсарыттан үөрэн, ас бөҕө астаабыт: алаадьыта диэн, бэрэскитэ диэн… Арай, кийиитим үчүгэй баҕайы хоруопкалартан хотуобай сасылыык этин, уонна били, сууси дииллэр дуу, хайы-сах дуу… дьоппуон аһын таһааран тэлгэтэн кэбистэ. Оҕолоро ону тута сылдьан мотуйуу. Сасылыыга саһарчы буспут, ону ааһан оҕурсута, помидора, лууга, тумата диэн буолунай.
Сураҕа, куорат мааны хотуттарыгар бэлэми буһаран аҕалар өҥө элбээбит үһү. Оннооҕор бэрэскини буһаран аҕалан биэрэллэр үһү. Хата, сыаната ботуччу дииллэр. Биһигинньиктэр биэнсийэбит сыыһыгар ол аҕыйахта уобаары тыһыынчанан тысхаҥныыр кыахпыт суох. Бэйи, тохтоон эрдиннэр!.. Оннооҕор, кэнники кэмҥэ «куһу үргээн биэрэбит» диэн өҥө үөскээбит үһү…
Ол да буоллар, санааҕа түстүм. Дьоммут, ыччаппыт букатын сүрэҕэ суох буолан эрэллэр дуу, хайдах дуу? Бэлэм баар аһы астаммат диэн тугуй, ээ? Бэрэскини да сатаан буһарар, куһу үргүүр кыахтара суох үһү дуо? Бириэмэбит суох диэн куотуналлар. Ии, дьэ, сүрэҕэ суох сүүс сүбэлээх. Былыр, оннооҕор холкуос-сопхуос өрөбүлэ суох, бүппэт үлэтигэр сылдьан, ас-таҥас кырыымчык да кэмнэригэр, дьахталлар, ийэлэр барахсаттар булан астыыр, хаһаанар, оҕолорун аһатар этилэрэ. Дьэ, хайдах-туох олоххо тиийэн эрэрбит буолла?..
Биэтэс Билээхэп.

+1
0
+1
0
+1
0
+1
0
+1
0
+1
0
+1
0