Тыаҕа тахсан сайылаан баран, кыстык хаар түһэ, халлаан тымныйа илигинэ куорат балыыһатыгар быраастарга көрдөрүнэн хааларга сананным. Кыыһым биэрбит “коллцентр” нүөмэригэр төлөпүөннээтим. Хаста даҕаны холонон көрөн баран аккаастанным. Боруобат уһугар биир нуучча дьахтара саҥаран баран тохтуо баара дуо?! Үс мүнүүтэни быһа кэтэспитим кэннэ: «Все операторы заняты”, — диэн эппитин этэ олорор.
edersaas.ru
Инньэ гынан, поликлиникабар барарга күһэлинним. Бүгүн суруйтардым да, сарсын тэрэпиэппэр киирэбин диэн бүк эрэллээх тиийбитим баара: “Кэлэр нэдиэлэҕэ эрэ суруйуохпун сөп эбэтэр уочаракка олорон кэтэһэҕин дуу?”, — диэтэ. Биирдэ оннук олорон көрбүттээхпин. “Первичнэйдэр”, онтон “повторнайдар” эбиитин мин иннибинэ кэлбит толуона суох дьон бары көрдөрүнэн тахсалларын кэтэһэн чолойон олорбутум. Дэлби дыбылыанньам тахсан, ыараан, бырааспар нэһиилэ ааппын эрэ билэр киһи киирбитим. Ону өйдүү биэрэн, нэдиэлэни кэтэһэргэ сөбүлэстим.
Аны кэйиэлээн сорбун сордообут кулгаахпын көрдөрүнээри, лору туоһуласпыппын букатын даҕаны уонча күнүнэн көрдөрүнэргэ суруйда. Иэдээн дьыала буолбатах дуо?! Ыалдьарбытын нэдиэлэ инниттэн сэрэйэн суруйтарыахтаахпыт эбитэ дуу, эбэтэр букатын анараа дойдуга аттанарбытын кэтэһэллэр дуу?
Бэйэбит тэрэпиэппит букатын уурайан чааһынай килииникэҕэ көспүт үһү. Быраас көстүөр диэри атын быраастарга көрдөрүнэҕит дэһэллэр. Быраастарбыт сылга хаста даҕаны уларыйаллар. Сыллата быраас үөрэҕин балачча элбэх оҕо бүтэрэр буолуохтаах. Бары ханна баралларын өйүм хоппот. Тыа сиригэр эмиэ быраас тиийбэт диэн ааттыыллар, мөлүйүөнүнэн мэҥиэлээн үлэлэтэ ыыталлар. Быраастартан бэйэлэриттэн ыйыталаһан көрдөххө: “Тэрэпиэп үлэтэ элбэҕэ бэрт, поликлиникаҕа халыҥ уочараты көрөн баран аны дьиэлэринэн сылдьан сытар ыарыһахтары көрүөххэ наада”, — дэһэллэр.
Быһайын кыыһым уолун сүрэҕин көрдөрөөрү гыммытын: “Оҕо балыыһата өрөмүөҥҥэ сабыллан турар. Бэйэбитигэр сүрэх бырааһа суох. Онон төлөбүрдээххэ барыҥ. Полиһынан оҕону босхо көрөллөр”, — диэн биир чааһынай килииникэҕэ утаарбыттар. Босхо көрдөрүммүттэр эрээри, туох баар УЗИ, суукканы быһа чинчийэр аппарааттара барыта төлөбүрдээх үһү. Тэҥнэһиэ дуо, тыһыынчалыынан ууран биэрбит. Чааһынай килииникилэргэ даҕаны халыҥ уочарат, үс-түөрт күн инниттэн суруйтараллар үһү. Урут күнү быһа уочараттаан, дабылыанньабыт таҕыстар да, син күнүнэн көрдөрүнэр этибит. Билигин буоллаҕына, букатын уончалыы күн кэтэһиннэрэллэр. Ити дуо, сайдыы бэлиэтэ?!
«Саха сирэ» хаһыат, edersaas.ru
Уруһуй интэриниэттэн туһанылынна.